Read Tshiluba Tshimuangi 37 Bible Online

Tshimuangi 37 - Tshiluba bible

Tshimuangi 37

¹Beshalele[217] kuenza mushete wa ndondu wa mitshi ya ndunga. Mushete awu uvua ne bule bua metre umue ne santimetre makumi abidi ne itanu, butshiama bua santimetre makumi muanda mutekete ne itanu, butumbuke bua santimetre makumi muanda mutekete ne itanu kabidi.

²Kulamikaye tshiamu tshia mpawungi munda mua mushete awu, panyima pawu ne ku mibangu.

³Kuenzaye nkanu inayi ya tshiamu tshia mpawungi bua kusuika ku mikolu inayi ya mushete awu, ibidi ku luseke ibidi ku lukuabu.

⁴Kusongaye mabaya abidi a mitshi ya ndunga, kualamikaye tshiamu tshia mpawungi ku nseke yonsu.

⁵Kubuejaye mitshi ayi ku nkanu ivua ku luseke lua mushete bua kuwambuilaku.

⁶Kuenzaye kabidi tshibuikidiji tshia mushete awu tshia tshiamu tshia mpawungi. Tshibuikidiji atshi, tshivua ne bule bua metre umue ne santimetre makumi abidi ne itanu, ne butshiama bua santimetre makumi muanda mutekete ne itanu.

⁷Pa tshibuikidiji apu, uvua muenzepu Bakerubine babidi ba tshiamu tshia mpawungi. Bavua ku ndekelu kua tshibuikidiji atshi nseke yonsu ibidi.

⁸Bakerubine abu bavua balamakane ne tshibuikidiji, ewu ku ditengu mukuabu ku ditengu.

⁹Bakerubine abu bavua batangilangane, binangila pa tshibuikidiji, bolola mapuapua mulu, bua kubuikila tshibuikidiji tshia mushete atshi.

¹⁰Beshalele kuenzaye kabidi mesa a mutshi wa ndunga.[218] Mesa awu avua ne bule bua metre umue, butshiama bua santimetre makumi atanu, butumbuke bua santimetre makumi muanda mutekete ne itanu.

¹¹Mesa avua malamika tshiamu tshia mpawungi mubidi mujima too ne ku mibangu.

¹²Ku nseke yonsu inayi ya mesa awu, kuvua mabaya malamika tshiamu tshia mpawungi avua ne santimetre muanda mukulu mu butshiama.

¹³Kuenzaye nkanu inayi ya tshiamu tshia mpawungi. Kulamikaye nkanu ayi ku matumba onsu anayi a mikolu inayi ya mesa.

¹⁴Nkanu ayi, ivua misuika ku mabaya. Mu nkanu ayi bavua babueja mitshi bua kuambula mesa.

¹⁵Beshalele kuenza kabidi mitshi ya ndunga ibidi. Kuyilamikaye tshiamu tshia mpawungi bua kuambuilaku mesa.

¹⁶Kuenzaye bintu bia kuteka pa mesa: malongu masalame, makopu, malongu mondoke, ne milangi ya kulambula milambu ya maluvu. Bintu bionsu abi bivua anu bia tshiamu tshia mpawungi menemene.

¹⁷Beshalele kuenza kabidi[219] tshitekelu tshia miendu tshia tshiamu tshia mpawungi. Tshitekelu tshia muendu atshi tshivua tshilamakane ne matamba atshi, tulongu tukese, mapu ne bilongu.

¹⁸Tshivua ne matamba asambombu, asatu ku luseke, asatu ku luseke lukuabu.

¹⁹Ku ditamba dionsu kuvua tulongu tukese tusatu, tuikale ne mapu ne bilongu bu mudi mutshi wa amande.

²⁰Ku tshitekelu tshia muendu aku kuenzaye kabidi tulongu tukese tunayi, tuikale ne mapu ne bilongu bu mudi mutshi wa amande.

²¹Matamba asambombu adi malamakaja abidi abidi ku tshitekelu, mikale ne dipu muinshi muawu.

²²Kadi matamba onsu ne mapu, bivua anu bilamakane, kabidi bia tshiamu tshia mpawungi nkayatshi.

²³Kuenzaye kabidi miendu muanda mutekete. Kuenzaye bintu bia kukuata nabi mudimu ku miendu: nkala ne bintu bia kuela butu. Bionsu bivua anu bia tshiamu tshia mpawungi.

²⁴Bintu bionsu bivua ku tshitekelu tshia muendu, bivua bienza ne kilo makumi asatu ya tshiamu tshia mpawungi menemene.

²⁵Pashishe Beshalele kuenza tshilambuilu tshia mutshi wa ndunga, bua kuoshilapu[220] milambu ya manananshi a tshijila. Tshilambuilu atshi, tshivua ne santimetre makumi atanu mu nseke yatshi yonsu. Butumbuke buvua ne metre umue. Kadi mu matumba onsu, muvua nsengu milamakane ne tshilambuilu atshi.

²⁶Tshilambuilu tshionsu, tshivua tshilamika tshiamu tshia mpawungi too ne ku nsengu ivua ku matamba anayi. Kabidi tshivua tshinyungulula ne mukaba wa tshiamu tshia mpawungi.

²⁷Kuenzaye nkanu ya bijengu ibidi ya tshiamu tshia mpawungi, ya kusuika ku luseke ne ku luseke, muinshi mua mukaba uvua ku tshilambuilu. Nkanu ayi ivua ya kubueja mutshi bua kuambula tshilambuilu.

²⁸Kuenzaye mitshi yandunga ibidi, kuyilamikaye tshiamu tshia mpawungi.

²⁹Pashishe muenji wa manananshi[221] kuenza mafuta a tshijila a kujidila nawu bantu ne bintu. Kuenzaye kabidi ne manananshi a tshijila a kuosha pa tshilambuilu.