Read Tshiluba Tshimuangi 4 Bible Online

Tshimuangi 4 - Tshiluba bible

Tshimuangi 4

¹Moshe kuandamuna Maweja-Nangila ne: — Bena Izrayele kabakuitaba, kabakukumbaja bionsu bindi mbambila to. Nebangele mpata, bamba ne: “Maweja-Nangila kena mukumuenekele to!”

²Maweja-Nangila kukonka Moshe ne: — Tshiudi natshi ku bianza atshi ntshinyi? Moshe kuandamuna ne: — Ndi ne dikombu.

³Maweja-Nangila kumuambila ne: — Ela dikombu adi panshi! Moshe udiela panshi, dikombu kuandamuka nyoka. Moshe kunyema nyoka awu.

⁴Kadi Maweja-Nangila kuambila Moshe ne: — Olola tshianza, ukuate nyoka awu ku mukila. Moshe kumukuata ku mukila, kumonaye ukadi ne dikombu mu bianza.

⁵Maweja-Nangila kuambila Moshe ne: — Enza tshishima etshi bua bena Izrayele bitabe, bajadike ne: meme Mvidi Mukulu wa bankambua babu, wa Abrahame, wa Izake ne wa Yakobe, ndi mukumuenekele.

⁶Maweja-Nangila kuambila Moshe kabidi ne: — Teka tshianza pa tshiadi tshiebe. Moshe kuteka tshianza pa tshiadi. Kadi pavuaye utshiumusha, tshivua tshitokesha bu busu bua ndanda kudi disama dia nsudi.

⁷Maweja-Nangila kuambila Moshe ne: — Pingaja tshianza tshiebe pa tshiadi. Moshe utshipingaja, utshiumusha kabidi. Tshianza kushala muatshi mua kale katshiyi ne disama dia nsudi to.

⁸Maweja-Nangila kuambila Moshe ne: — Pikala bena Izrayele kabayi bakuitaba bua tshishima tshia kumpala, nebakuitabe bua tshishima tshibidi etshi.

⁹Kadi pikala bena Izrayele kabayi bakuitaba bua bishima bibidi ebi, utunte mayi a mu musulu wa Nile, witshikije panshi. Mayi awu neandamuke mashi.

¹⁰Moshe kubenga, wambila Maweja-Nangila ne: — Maweja-Nangila, tshiena mua kuya to. Katshia bandela too ne mpindiewu patudi nebe apa, tshiena mumanye mua kuakula bimpe to. Ndi ntata bikole bua kuamba bualu.

¹¹Maweja-Nangila kuandamuna ne: — Lekela kuamba nanku. Udi mufuke muntu ne mukana mua kuakula nnganyi? Nanku muntu udi mua kuakula bimpe nansha kushala kamama, kumvua nansha kuikala ne mapapa, kumona nansha kayi umona ku bukole bua nganyi? Ki nku bukole buanyi meme Maweja-Nangila anyi?

¹²Nanku, kuajiki! Ndaku. Nenkuambuluishe bua wakule bimpe. Nenkumanyishe malu a wewe kubambila.

¹³Moshe kubenga, wamba ne: — Ndi nkusengelela ne: utume muntu mukuabu.

¹⁴Ke Maweja-Nangila kufikila Moshe munda, umuambila ne: — Muanenu Arone, muena Levi, udi mumanye mua kuakula bimpe. Nyeye wawa mu njila bua kumonangana nebe. Pakumonaye neasanke.

¹⁵Neumumvuije tshidiye mua kuamba. Nennuambuluishe wewe ne muanenu Arone bua nuakule bimpe. Nennumanyishe tshinudi mua kuenza.

¹⁶Arone neakule ne bantu, ubambila malu auvua ne bua kuamba wewe. Wewe newikale bu Mvidi Mukulu, udi umumanyisha tshidiye mua kuamba, yeye neikale muambi webe.

¹⁷Ukuate kabidi dikombu edi mu tshianza, wenze nadi bishima.

¹⁸Moshe kuya kudi tatuende muenu Yetro, kumuambila ne: — Ndi ne bua kuya kumonangana ne bana betu badi bashala mu Ejipitu bua kujadika ne: batshidi ne muoyi. Tatuende muenu kuitaba ne: — Waya bimpe.

¹⁹Anu mu Madiyane amu,[23] Maweja-Nangila kuambila Moshe ne: — Eyowa, pingana mu Ejipitu, bualu bantu bonsu bavua bakuelela meji mabi mbamane kufua.

²⁰Moshe kuangata dikombu divua Mvidi Mukulu mumuambile bua kuya nadi. Kupinganaye mu Ejipitu. Uvua muambule mukajende ne bana bende pa nyama wa mpunde.

²¹Maweja-Nangila kuambila kabidi Moshe ne: — Ndi nkupesha bukole bua kuenza bishima. Pawafika kudi mukalenga wa bena Ejipitu, wenze bishima bionsu bindi mukuleje. Kadi meme nemmupeshe muoyi wa tshitunu. Kakuanyisha bua bena Izrayele bumuke to.

²²Wewe umanyishe mukalenga wa bena Ejipitu ne: Maweja-Nangila udi wamba ne: “Izrayele udi muananyi wa balume muanabute.

²³Nanku ndi nkutumina diyi ne: umulekele, aye kuntendelela. Kadi paudi ubenga bua kumulekela, ndi nshipa muanebe wa balume muanabute.[24]”

²⁴Pavua Moshe mu njila,[25] ulala mu nzubu wa tshilala benyi, kusambakenaye ne Maweja-Nangila uvua ukeba kumushipa.

²⁵Nanku Sefora, mukaji wa Moshe, kuangata dibue ditue, kuteka nadi muanende wa balume panshi. Pashishe kuangata dikoba divuaye mukose muana adi, kudilaba Moshe pa mbidi wamba ne: “Udi bayanyi wa mashi.”

²⁶Nanku Maweja-Nangila kumuka muaba uvua Moshe, Sefora uvua muambe ne: “Bayanyi wa mu mashi” bua dimuteka panshi.

²⁷Maweja-Nangila kuambila Arone ne: — Uye kumonangana ne muanenu Moshe mu tshipela. Arone kuya, usangana Moshe ku mukuna wa Mvidi Mukulu.[26] Kumupukilaye.

²⁸Moshe kuambila Arone bionsu bivua Maweja-Nangila mumuambile. Kumumanyishaye kabidi bishima bivuaye mumuleje bua kuenza.

²⁹Nanku Moshe ne Arone kuya mu Ejipitu, kusangisha bakulu bonsu ba bena Izrayele.

³⁰Arone kubambuluila bionsu bivua Maweja-Nangila muambile Moshe. Moshe kubaleja bishima.

³¹Bantu bamona nanku, kuitababu. Kujadikabu ne: Maweja-Nangila wamonyi makenga etu, watusambi. Kutuabu binu panshi bua kumutendelela.