Read Tshiluba Tshimuangi 6 Bible Online

Tshimuangi 6 - Tshiluba bible

Tshimuangi 6

¹Maweja-Nangila kuambila Moshe ne: — Neudimuene nkayebe mundi ngenzeja mukalenga wa bena Ejipitu ku bukole bua kulekelaye bena Izrayele baye. Nemmuenzeje kabidi ku bukole bua abipate mu ditunga diende.

²Mvidi Mukulu kuambila Moshe kabidi ne: — Meme ndi “Maweja-Nangila.”

³Meme ke Mvidi Mukulu wa bukole buonsu uvua mumuenekele Abrahame, Izake ne Yakobe. Kadi tshivua mubambile dina dianyi dia Maweja-Nangila[29] to.

⁴Mvua mutue nabu ndondu, mubalaye mua kubapesha ditunga dia Kenaane divuabu basombe bu bantu benyi.

⁵Mpindiewu ndi mumvue miadi ya bena Izrayele badibu bakuate mu bupika kudi bena Ejipitu. Ke pandi muvuluke ndondu umvua mutue nabu.

⁶Nanku ambila bena Izrayele mu dina dianyi ne: “Ndi Maweja-Nangila! Nennumushe ku midimu mikole inudi nuenzela bena Ejipitu. Nennupatule ku bupika budibu banukuate. Nengenzeje bena Ejipitu ku bukole, mbanyoke bikole bua kunusungidila.

⁷Nenuikale bantu banyi, nengikale Mvidi Mukulu wenu. Nenujadike ne: meme Maweja-Nangila ndi Mvidi Mukulu wenu. Ndi munumushe ku midimu mikole inuvua nuenzela bena Ejipitu.

⁸Nennufile mu ditunga dimvua mulaye Abrahame, Izake ne Yakobe. Ditunga adi nedishale bupianyi buenu. Meme Maweja-Nangila ndi njadika bualu ebu.”

⁹Moshe kuambila bena Izrayele malu awu. Kadi kabavua bamuitaba to, bualu bavua ne kanyinganyinga bua dikenga divuabu nadi mu bupika.

¹⁰Maweja-Nangila kuambila Moshe kabidi ne:

¹¹— Ambila mukalenga wa bena Ejipitu, alekele bena Izrayele bumuke mu ditunga diende.

¹²Moshe kuandamuna Maweja-Nangila ne: — Bu mudi bena Izrayele kabayi bateleja bindi mubambile, mukalenga wa bena Ejipitu kabidi kakuitaba to, bualu ndi ngakula ne lutatu.

¹³Maweja-Nangila kuambila Moshe ne Arone ne: “Nunganyishe bena Izrayele ne mukalenga wa bena Ejipitu malu onsu aa bua bena Izrayele bamone mua kumuka mu Ejipitu.”

¹⁴Ke mena a bisamba bia bena Izrayele[30]: Rubene, muanabute wa Yakobe, uvua ne bana balume banayi: Anoke, Palu, Esrone ne Karmi. Ke bankambua ba meku a bena Rubene.

¹⁵Shimeyone uvua ne bana ba balume basambombu: Yemuyele, Yamine, Ohade, Yakine, Sohare ne Shawule uvuaye mulele ne mukaji wa bena Kenaane. Ke bankambua ba meku a bena Shimeyone awu.

¹⁶Levi uvua mulele bana ba balume basatu: Ngershone, Kehate ne Merari. Levi wakushala ne muoyi bidimu lukama ne makumi asatu ne muanda mutekete.

¹⁷Ngershone uvua mulele bana ba balume babidi: Libni ne Shimeyi. Bana aba ke bankambua ba meku adi ne dina diabu.

¹⁸Kehate uvua mulele bana ba balume banayi: Amrame, Ishare, Ebrone ne Uziyele. Kehate wakashala ne muoyi bidimu lukama ne makumi asatu ne bisatu.

¹⁹Merari uvua mulele bana ba balume babidi: Mali ne Mushi. Ke muvua bankambua ba bena Levi ne ndelanganyi yabu nanku.[31]

²⁰Amrame uvua musele tatuende mukaji Yokebede. Mukaji ewu kulela Moshe ne Arone. Amrame wakashala ne muoyi bidimu lukama ne makumi asatu ne muanda mutekete.

²¹Ishare uvua mulele bana ba balume basatu: Kora, Nefege ne Zikri.

²²Uziyele uvua mulele bana ba balume basatu: Mishayele, Elishafane ne Sitri.

²³Arone uvua musele Elisheba muana wa Aminadabe. Elisheba awu uvua muanabu ne Nashone. Elisheba kulela bana ba balume banayi: Nadabe, Abiku, Elazare ne Itamare.

²⁴Kora uvua mulele bana ba balume basatu: Asire, Elkana ne Abiyashafe. Ke bankambua ba meku a bena Kora.

²⁵Elazare, muana wa Arone, uvua musele muana wa Putiyele. Mukaji awu kulela Pinhase. Ke mudi bankambua ba meku a tshisamba tshia bena Levi nanku.

²⁶Arone ne Moshe ke bavua Maweja-Nangila muambile ne: “Nupatule bena Izrayele bonsu balondangane bimpe mu bisamba biabu mu Ejipitu.”

²⁷Anu bobu aba ke bavua bambile mukalenga wa bena Ejipitu bua anyishe bena Izrayele bumuke bonsu mu ditunga diende.

²⁸Pavua Maweja-Nangila uyukila ne Moshe mu ditunga dia Ejipitu,

²⁹uvua mumuambile ne: — Ndi Maweja-Nangila, ambila mukalenga wa bena Ejipitu bionsu bindi mukuambile.

³⁰Kadi Moshe kumuandamuna ne: — Mukalenga wa bena Ejipitu kena mua kumvua tshindi ngamba to, bualu ndi ngakula ne lutatu.