Read Tshiluba Tshimuangi 8 Bible Online

Tshimuangi 8 - Tshiluba bible

Tshimuangi 8

¹Maweja-Nangila kuambila Moshe ne: — Ambila Arone ne: olola diboku, atangije dikombu pa mayi adi mu musulu, mu tusulu tukese ne mu majiba, bua ndimba ipatukemu ibuele mu ditunga dia Ejipitu.

²Arone kuolola diboku ku mutu kua mayi onsu mu ditunga dia Ejipitu. Ndimba kupatuka kubuela mu ditunga dionsu dia Ejipitu.

³Kadi benji ba bilengulengu ba bena Ejipitu kuenza tshishima atshi, ne majimbu abu. Ndimba kubuela mu ditunga dijima dia Ejipitu ne ku mudimu wabu.

⁴Mukalenga wa bena Ejipitu kubikila Moshe ne Arone. Kubambilaye ne: — Nundombele kudi Maweja-Nangila: umushe ndimba eyi, idi itutatshisha meme ne bantu banyi. Nanku nenganyishe bena Izrayele baye kulambula Maweja-Nangila milambu.

⁵Moshe kuandamuna ne: — Unjadikile dituku diudi musue, nkulombele bua Mvidi Mukulu abutule ndimba idi ikutatshisha wewe ne balombodi ba mu bukalenga buebe, kabidi ne bantu bebe, bua ishale anu mu musulu wa Nile.

⁶Mukalenga wa bena Ejipitu kumuambila ne: — Undombele malaba. Moshe kumuambila ne: — Nebikuenzekele muudi ulomba anu bua ujadike ne: kakuena utudi mua kufuanyikija ne Maweja-Nangila Mvidi Mukulu wetu.

⁷Ndimba neyipatuke mu nzubu muebe, mua balombodi ba mu bukalenga buebe ne mua bantu bebe bonsu. Neyishale anu mu musulu wa Nile.

⁸Moshe ne Arone kushiyangana ne mukalenga wa bena Ejipitu. Moshe kutendelela Maweja-Nangila bua umushe ndimba iwaye mutumine mukalenga wa bena Ejipitu.

⁹Maweja-Nangila kuitaba bivua Moshe umulomba. Ndimba yonsu ivua mu nzubu, mu mbanza ne mu madimi kufuayi.

¹⁰Kukungujabu ndimba ayi mishiki ne mishiki. Ditunga dijima kununkadi mupuya mubi.

¹¹Mukalenga wa bena Ejipitu umona ne ndimba yajiki, tshitunu kumuenzatshi. Kena muitabe diyi dia Moshe ne Arone bu muvua Maweja-Nangila mudianjile kuamba.

¹²Maweja-Nangila kuambila Moshe ne: — Ambila Arone ne: tuuta dikombu panshi bua lupuishi luandamuke tumue[36] mu ditunga dijima dia Ejipitu.

¹³Moshe ne Arone kuenza bionsu abi. Arone kutuuta dikombu panshi. Lupuishi kuandamuka tumue mu ditunga dionsu dia Ejipitu. Tumue atu tuvua tusuma bantu ne nyama.

¹⁴Benji ba bilengulengu ba bena Ejipitu kuidikija mua kuipata tumue atu,[37] ku majimbu abu. Kadi kupangilabu. Tumue tuvua tusuma amu kusuma bantu ne nyama.

¹⁵Benji ba bilengulengu bamone nanku, kuambilabu mukalenga wa bena Ejipitu ne: — Ebi bidi bienzeka ku bukole bua Mvidi Mukulu.[38] Kadi mukalenga wa bena Ejipitu uvua anu ne tshitunu. Kubengaye diyi dia Moshe ne Arone bu muvua Maweja-Nangila mudianjile kuamba.

¹⁶Maweja-Nangila kuambila Moshe ne: — Malaba dinda, padi mukalenga wa bena Ejipitu upatuka bua kuya ku musulu wa Nile, uye kumuambila ne: “Maweja-Nangila mmuntume bua ulekele bantu bende, baye kumutendelela.

¹⁷Kadi pawabenga neakunyoke, akutumine njiji. Neyikale pambidi pebe[39] wewe, pa balombodi ba mu bukalenga buebe ne pa bantu bebe bonsu. Njiji neikale mu ditunga dionsu dia Ejipitu: mu nzubu yonsu ne panshi ponsu.

¹⁸Kabidi bua wewe kujadika ne: ndi mulame bantu banyi nansha mu ditunga diebe mene, tshiakutuma njiji mu Ngoshene[40] to, bualu mmuaba udibu basombe.

¹⁹Dikenga dindi nkuatshisha bantu bebe kadiakukuata banyi meme. Nengenze tshishima etshi malaba.”

²⁰Maweja-Nangila kuenza tshishima atshi, kutuma njiji mipite bungi. Njiji ayi kunyanga ditunga dijima dia Ejipitu. Ivua mu nzubu mua mukalenga, mu nzubu mua balombodi ba mu bukalenga buende, ne mu nzubu ya bantu bonsu.

²¹Mukalenga wa bena Ejipitu kubikila Moshe ne Arone. Kubambilaye ne: — Lambulayi Mvidi Mukulu wenu milambu anu mu ditunga emu!

²²Moshe kuandamuna ne: — Kabiena mua kuenzeka to. Bualu nyama itudi tulambula Maweja-Nangila Mvidi Mukulu wetu, bena Ejipitu badi bayinemeka.[41] Pamonabu tulambula nyama ayi, nebatuase mabue batushipa.

²³Tuyaya mu tshipela, tuenze luendu lua matuku asatu bua kulambula Maweja-Nangila Mvidi Mukulu wetu milambu idiye musue.

²⁴Mukalenga wa bena Ejipitu kuandamuna ne: — Nuambi bimpe, ndi nnutekela, nuye kulambula Maweja-Nangila Mvidi Mukulu wenu milambu mu tshipela. Nuatendelelaku bualu buanyi. Kadi kanuyi mutantshi mule to.

²⁵Moshe kuandamuna ne: — Pandi ngumuka muaba ewu, nensengelele Maweja-Nangila bua malaba njiji yumuke ku nzubu kuebe, kua balomboodi ba mu bukalenga buebe ne ku nzubu ya bantu bebe bonsu. Kadi, wewe pebe ulekele kutulembakaja. Kutukandiki tshiakabidi bua bena Izrayele kabayi kulambula Maweja-Nangila milambu.

²⁶Moshe kumuka kua mukalenga wa bena Ejipitu bua kuya kutendelela Maweja-Nangila.

²⁷Maweja-Nangila kuitaba bivua Moshe ulomba. Njiji yonsu kumuka kua mukalenga wa bena Ejipitu, kua balombodi ba mu bukalenga buende ne kua bantu bende bonsu.

²⁸Kadi mukalenga wa bena Ejipitu kuenza kabidi tshitunu. Kena muanyishe bua bena Izrayele bumuke to.