Read Tshiluba Tshimuangi 9 Bible Online

Tshimuangi 9 - Tshiluba bible

Tshimuangi 9

¹Maweja-Nangila kuambila Moshe ne: — Uye kudi mukalenga wa bena Ejipitu, umuambile ne: “Maweja-Nangila, Mvidi Mukulu wa bena Ebrewu, udi wamba ne: Lekela bantu banyi baye kuntendelela.

²Wewe mubenge bua kubatekela, wewe mubakandike amu kubakandika,

³nenkunyoke bikole, mbutule bimuna biebe bionsu ne disama dikole dia tshiambu. Mpunde, tubalu, tumelu, ngombe, mikoku ne mbuji, bionsu nebibutuke.

⁴Kadi nensunguluje bimuna bia bena Izrayele ne bia bena Ejipitu. Tshimuna tshia bena Izrayele katshiakufua nansha tshimue.”

⁵Maweja-Nangila kujadikila Moshe kabidi ne: — Nengenze tshishima etshi mu Ejipitu malaba.

⁶Butshia dinda, Maweja-Nangila kuenza muvuaye muambe. Bimuna bia bena Ejipitu kufua bionsu. Kadi tshimuna tshia bena Izrayele katshiena tshifua nansha tshimue.

⁷Mukalenga wa bena Ejipitu kukonka bantu bende bua kujadika tshivua tshienzeke. Kumuambilabu ne: bimuna bia bena Izrayele kabiena bifua nansha tshimue. Kadi mukalenga wa bena Ejipitu kena mutekete bena Izrayele to. Uvua anu ne tshitunu.

⁸Maweja-Nangila kuambila Moshe ne Arone ne: — Nuboye butu bua muiku mu bianza. Moshe neele butu abu mulu, mukalenga wa bena Ejipitu mutangile.

⁹Butu abu nebuandamuke lupuishi mu ditunga dijima dia Ejipitu. Lupuishi alu, neluenzeje maputa[42] apatuka tufina pambidi pa bantu ne pa nyama.

¹⁰Moshe ne Arone kuboya butu bua muiku, kuya nabu kumpala kua mukalenga wa bena Ejipitu. Moshe kuela butu abu mulu. Kuenzabu maputa apatuka tufina pambidi pa bantu ne pa nyama.

¹¹Bena majimbu ba bena Ejipitu kupanga mushindu wa kumonangana ne Moshe, bualu bavua ne maputa bu bena Ejipitu bonsu.

¹²Mukalenga wa bena Ejipitu kubenga diyi dia Moshe ne Arone, bualu Maweja-Nangila uvua mumupeshe muoyi wa tshitunu nuwuaye mudianjile kuambila Moshe.

¹³Maweja-Nangila kuambila Moshe ne: — Malaba dinda, uye kumonangana ne mukalenga wa bena Ejipitu, umuambile ne: “Maweja-Nangila Mvidi Mukulu wa bena Ebrewu udi wamba ne: ‘Lekela bantu banyi baye kuntendelela.

¹⁴Mpindiewu ndi mujadike bua kukutumina makenga a mishindu yonsu, wewe ne balombodi ba bukalenga kabidi ne bantu bebe bonsu, bua ujadike ne: pa buloba bujima kakuena mukuabu, amu meme!

¹⁵Bu meme mukutumine wewe ne bantu bebe disama dikole dia tshiambu, bonsu nuvua mua kuikala bamane kubutuka.

¹⁶Kadi ndi mukushiye ne muoyi, bua ujadike bukole buanyi, kabidi bua lumu luanyi lumanyike pa buloba bujima.[43]

¹⁷Kadi utshidi anu uditambisha, ubenga mua kutekela bantu banyi.

¹⁸Nanku, malaba pa diba edi, nendokeshe mvula mukole wa mabue, udi kayi muanji kuloka mu ditunga dijima dia Ejipitu too ne mpindiewu.’

¹⁹Nanku tuma diyi lukasa bua bantu bumushe bimuna biabu ne bintu biabu bionsu bidi mu mpata, bualu bantu ne bintu bikale mu mpata nebifue ku mabue a mvula.”

²⁰Balombodi bakuabu ba mu bukalenga kuangata bualu abu ne mushinga, kubueja bapika babu ne bimuna biabu bionsu mu nzubu.

²¹Kadi balombodi bakuabu kabavua bangata miaku ya Maweja-Nangila ne mushinga. Bavua bashiya bena mudimu babu ne bimuna biabu mu mpata.

²²Ke Maweja-Nangila kuambila Moshe ne: — Olola diboku mulu bua mvula mukole wa mabue aloke, alokele bena ditunga dia Ejipitu, bimuna biabu ne bintu bionsu bidi mu madimi.

²³Moshe kuela dikombu mulu. Maweja-Nangila kulokesha mvula mukole wa makubakuba ne wa mabue.

²⁴Mvula mukole wa mabue ne makubakuba[44] wa nanku katshia kavua muanji kuloka mu ditunga dia Ejipitu.

²⁵Mabue a mvula awu kushipa bantu ne bimuna bia mu ditunga dia Ejipitu. Kunyangakajaye kabidi bikunyibua bivua mu madimi ne mitshi yonsu.

²⁶Kadi kavua muloke mu Ngoshene[45] to, bualu mmuaba uvua bena Izrayele basombe.

²⁷Mukalenga wa bena Ejipitu kubikidisha Moshe ne Arone, kubambila ne: — Maweja-Nangila mmuenze amu bimpe, kena ne bualu to. Meme ne bantu banyi tudi benze bibi.

²⁸Numulombe: alekele kulokesha mvula wa makubakuba ne mabue, bualu mbimane kuntonda. Nennulekele, nuye. Tshiena nnulama kabidi to.

²⁹Moshe kumuandamuna ne: — Pangumuka mu musoku emu, nengele bianza mulu kudi Maweja-Nangila bua mvula wa makubakuba ne mabue akamuke. Nanku neujadike ne: buloba buonsu mbua Maweja-Nangila.

³⁰Kadi ndi mumanye ne: wewe ne balombodi ba mu bukalenga buebe, kanuena banji kutshina Maweja-Nangila to.

³¹Bikunyibua bikuabu bivua pa madimi kunyanguka bualu bikavua bimane kupatula miepu, biela ne bilongu.

³²Kadi bikunyibua bikuabu kabivua binyanguke, bualu kabivua bianji kutoloka to.

³³Moshe kumuka kudi mukalenga wa bena Ejipitu, kupatuka mu musoku. Kuelaye bianza mulu kudi Maweja-Nangila. Mvula kukamuka, makubakuba ne mabue a mvula kujika.

³⁴Mukalenga wa bena Ejipitu umona ne: mvula wakamuki, kabidi makubakuba ne mabue a mvula biajiki, kutungunukaye amu ne tshilema tshiende. Yeye ne balombodi ba mu bukalenga buende kuenza kabidi amu tshitunu.

³⁵Mukalenga wa bena Ejipitu kena mulekele bena Izrayele to, bualu uvua ne tshitunu bu muvua Maweja-Nangila mudianjile kuambila Moshe.