Read Tshiluba Yobe 10 Bible Online

Yobe 10 - Tshiluba bible

Yobe 10

¹Bia panu bidi bindukisha, tshiena ndekela kutua mikemu, tshiena mua kupuwa to, bualu ndi nyingalala bikole.

²Nenkandike Mvidi Mukulu ne: kumfundidi tshibawu to. Kadi ummanyishe tshilumbu tshindi natshi!

³Paudi unkengesha nenku, udi wipatshila tshinyi? Udi upepeja tshiudi wewe mufuke bua tshinyi? Muudi useka paudi umona meji adi bantu babi bela mbishi?

⁴Biudi wewe umona, kabiena bipite bidi bantu bamona anyi? Wewe udi ujingulula malu mushindu umue ne badi basomba pa buloba anyi?

⁵Matuku ebe adi mabala ku minu bu etu anyi? Bidimu biebe bidi bikese bu bia bantu anyi?

⁶Kadi udi ukeba kumanya bilema bianyi bua tshinyi? Udi musue kutandula bubi buanyi bua tshinyi?

⁷Kadi udi amu mumanye ne: tshiena muena tshibawu to. Kabidi ne kakuena muntu udi mua kunnyenga mu bianza biebe.

⁸Bianza biebe bivua bimfuke, bimfumbe, mpindiewu bidi binkuata, bikeba kumbutula!

⁹Uvuluke muuvua mumfumbe ne buloba bua diima. Ukadi ukeba kumpingaja mu lupuishi anyi?

¹⁰Dituku dikuabu, tatu wanyi kubuelela mamu wanyi mu nzubu, wewe kutuadija kufimba mubidi wanyi munda mua mamu wanyi, bu mudibu bakuatakaja mabele mu luesu.

¹¹Ke wewe kumvuadika dikoba ne misunya! kundamakaja ne minyinyi ne mijilu.

¹²Pashishe wewe kumpesha muoyi, kunnanga kabidi. Meme kushala ne muoyi bualu uvua mundame!

¹³Kadi mpindiewu ndi mumanye ne: Uvua ne bualu buuvua musue kunsokoka, uvua ne meji makuabu munda muebe.

¹⁴Uvua musue kujikidila ngenza bubi bua umone mua kunnyoka ku kalema konsu kandi naku!

¹⁵Nenku meme muenze bibi, ndi muena diakabi! Kadi meme muenze bimpe, kabena bangangata ne mushinga to. Ndi amu ne bua kufua bundu, kubuela mu dikenga.

¹⁶Kadi pandi mbanduluka, mpeta bukole, udi ungipata meme bu nyama wa ntambue, udi unzaza, wenza nansha malu a kukema, bua kunkuatshisha bowa.

¹⁷Udi unsongakaja ne bantu bapiabapia, badi banjadikila ne malu a dishima, bua umone mua kumvudijila tshiji tshiebe, kunduisha amu kunduisha mishindu yonsu.

¹⁸Uvua mumpatule munda mua mamu wanyi bua tshinyi? Diba adi mvua mua kufuilamu, muntu nansha umue kayi mua kummona.

¹⁹Mvua mua kupatuka munda mua mamu bua kubuela buludi mu lukita, mvua mua kufuanangana ne muntu uvua kayi mupete muoyi.

²⁰Matuku anyi a panu mmashale makese. Nanku, lekela kunduisha, umuka kundi bua nsombe talalaa matuku makese andi mushale nawu.

²¹Nkadi makasa matangila mu ditunga dia bafue, dia miidima, tshiena mua kupingana panu to.

²²Mu ditunga adi mudi amu miidima ne tshimvundu, nansha munya kabidi mmufuanangane ne butuku.