Read Tshiluba Yobe 11 Bible Online

Yobe 11 - Tshiluba bible

Yobe 11

¹Sofare, muena Naama kuambila Yobe ne:

²Muntu udi mua kuandamuna ku miaku ya patupu, idi muntu awu wakula amu kuakula anyi? Muntu udi mua kubinga bua bungi bua miaku idiye wamba anyi?

³Udi wela meji ne: biakulakula biebe bidi mua kutubuikidija mukana anyi? Tudi mua kuteleja miaku iudi utuseka nayi, utupepeja katuyi tuandamuna anyi?

⁴Uvua wamba kabidi ne: “Tshiena nshima to. Mvidi Mukulu mene udi mua kujadika mundi tshiyi ne bualu!”

⁵Eyowa, ndi musue Mvidi Mukulu akuandamune, akuambile malu buludi.

⁶Bu yeye mua kukuleja mushindu udiye ukuata mudimu ne meji mu musokoku, mudimu utudi tuetu bantu katuyi mua kujingulula, nanku diba adi uvua mua kujingulula ne: Mvidi Mukulu udi ulengulula bilema biebe bia bungi.

⁷Kadi wewe udi mua kumanya malu adi munda mua Mvidi Mukulu anyi?

⁸Bukole buende mbupite bua diulu, tshiudi mua kuenza ntshinyi? Budi ne bondoke bupite bua dijimba dia bafue, tshiudi mua kushikuluja ntshinyi?

⁹Bunene buende mbualabale, bupite buloba, bupite ne mayi manene.

¹⁰Nanku, padi Mvidi Mukulu ufika kuebe, ukukuata bu muena tshibawu, uya nebe ku kabadi, udi mua kumutuila nkanana nnganyi?

¹¹Bualu Mvidi Mukulu mmumanye bikole bantu batshimbakane. Udi mumone bantu badi benza bibi, kayi ne lutatu bua kubanyoka.

¹²Kadi muntu wa tshidingidingi neapete lungenyi, anu dituku didi nyama wa mpunde wa muitu, uvua mpunde wa pambelu.[44]

¹³Kadi wewe Yobe, olola bianza biebe kudi Mvidi Mukulu, umutendelele.

¹⁴Owa mayi ku bianza biebe bidi binyanguke ne bubi. Kuitabi bua malu mabi ashale kuudi.

¹⁵Nanku neumone mua kutangila bantu bonsu, kuyi ne bowa. Bu muudi kuyi ne tshilumbu nansha tshimue, kuena mua kuzakala to.

¹⁶Kuakuvuluka makenga ebe a kale to. Neikale bu mayi a musulu mamane kupueka.

¹⁷Newende ne disanka dikole dipite dia diba didi dikenka munda munya. Miidima neyandamuke yenze munya wa dinda.

¹⁸Neusombe talala, muoyi muwule ne ditekemena tente. Neumone ne bionsu bidi bienda bimpe, nanku neulale kuyi utshina tshintu.

¹⁹Muntu nansha umue kakunyanga dikisha diebe. Kadi bantu bonsu nebakebe mua kukulonda mu nyima.

²⁰Kadi, bena malu mabi badi bakeba bantu badi mua kubambuluisha, kabena mua kubapeta to. Bobu badi mua kutekemena amu lufu.