Read Tshiluba Yobe 13 Bible Online

Yobe 13 - Tshiluba bible

Yobe 13

¹Nanku bionsu binudi nuamba ebi, ndi mumane kubimona kale. Ndi mumane kubiumvua, mubijingulule.

²Bionsu binudi bamanye, ndi mubimanye kabidi. Lungenyi lundi nalu kaluena lushadile kudi luenu to.

³Meme ndi musue kuyukila ne Mvidi Mukulu wa bukole buonsu. Ndi musue kudilumbuluila kumpala kuende.

⁴Kadi nuenu bu munudi nupanga kufila meji, nudi nufuikakaja malu a dishima. Nudi bu baminganga badi kabayi mua kuondapa muntu.

⁵Nanku mbimpe kupuwa. Nanku bantu badi mua kunuangata bu bena meji.

⁶Pandi ndilumbuluila, teleja ne ntema malu andi ngamba.

⁷Nudi nuamba malu a dishima bua tshinyi? Nudi nuelangana meji ne ke bidi biambuluisha Mvidi Mukulu anyi?

⁸Nudi basue kuditua ku tshiende, nudi nujinga kumulumbuluila anyi?

⁹Kadi bu yeye mua kunuteta, nudi mua kubinga anyi? Nudi nushima Mvidi Mukulu bu munudi nushima muntu anyi?

¹⁰Nansha nuenu banshiminyina malu mu musokoku, yeye neanutandishe bulelela.

¹¹Kanuena nutshina bukole bua Mvidi Mukulu anyi? Kanuena nuzakala bua butumbi buende anyi?

¹²Miaku yenu idi bu butu, katuena mua kukuata nayi mudimu kabidi to. Meji anudi nufila adi bitotshi.

¹³Puwayi, ngakula meme! Bidi mua kuenzeka, nebingenzekele.

¹⁴Ndi mumane kudilongolola, nansha bu meme ne bua kufua.[47]

¹⁵Nansha Mvidi Mukulu musue kunshipa, anshipe,[48] tshindi mua kutekemena kabidi ntshinyi? Kadi ndi anu musue kudilumbuluila, kumpala kuende.

¹⁶Bia nanku bidi bimpetesha lupandu. Bualu muena mpala ibidi, kena mua kusemena kudiye.

¹⁷Nanku, telejayi bimpe tshindi ngamba, nuteye matshi anu bua numvue miaku yanyi.

¹⁸Eyowa, ndi udilongolola bua kulumbulula. Kadi ndi mumanye ne: tshiena mua kupila to.

¹⁹Biangatshile lelu, muntu udi mua kungasa tshilumbu anyi? Ndi mumane kudilongolola, pandi mua kupila, nempuwe, nansha bua kufua ndi musue.

²⁰Mvidi Mukulu wanyi, umpeshe amu bintu bibidi, bua mmone mua kuimana kumpala kuebe.

²¹Anji kumusha tshianza tshiebe pambidi panyi, pashishe, lekela kunkuatshisha bowa.

²²Nanku udi mua kuanji kuakula, meme nenkuandamune. Nansha meme nengakule, wewe ungandamune.

²³Bilema kabidi ne bubi bindi muenze bidi bishi? Undeje mundi mukutombokele.

²⁴Udi ungela nyima, ungangata bu muluishi webe bua tshinyi?[49]

²⁵Uudi wipata nnganyi? Ndi amu dibeji didi dipepuka. Uudi amu ulondakaja nnganyi? Ndi amu tshisosa tshimane kuma.

²⁶Udi ungasa bilumbu bikole be. Udi unnyoka nansha bua bilema bia ku buana.

²⁷Udi muele makasa anyi mu tshikunyi.[50] Udi ukenketa bionsu bindi ngenza. Udi utangila too ne muaba undi mudiate!

²⁸Kadi ndi amu bu mutshi mumane kuuma, nansha bu tshilamba tshimana kudia kudi musuasua.