Read Tshiluba Yobe 15 Bible Online

Yobe 15 - Tshiluba bible

Yobe 15

¹Pashishe Elifaze wa mu tshimenga tshia Temane, kuambilaye Yobe ne:

²Mudi muena meji bu wewe wakula amu kuakula, wamba bualu kabuyi bumvuika mbishi? Mudiye mua kuandamuna bibi nanku mmunyi?

³Bionsu biudi wamba, kabiena mua kukuambuluisha. Meji audi ufila neakulengelele ku tshinyi?

⁴Muntu udi witaba tshiudi wamba, kena mua kutshina kabidi Mvidi Mukulu to.

⁵Bubi buebe budi bumueneka ku biudi wamba, nansha wewe ukeba kudileja bu muena meji.

⁶Tshidi tshikupisha ki mmeme to, mmiaku yebe. Bionsu biudi wamba bidi bikusonguela.

⁷Wewe udi muntu wa kumpala pa buloba anyi? Bavua bakulela mikuna kayiyi mifuka anyi?

⁸Pavua Mvidi Mukulu mu tshipangu wela meji, uvua mumuteleje anyi? Ku bantu, anu wewe nkayebe ke udi wela meji anyi?

⁹Tshiudi mua kumanya, katuyi mua kutshijingulula ntshinyi? Tshiudi mua kujingulula, tuetu kutshipangila ntshinyi?

¹⁰Munkatshi muetu, mudi bantu bavua balonge malu bikole. Badi ne bidimu bia bungi bipite bivua tatuebe nabi.

¹¹Mvidi Mukulu udi ukusamba ne miaku ya mukana muetu, muudi uyilengulula mmunyi?

¹²Muudi ufika munda musangu umue mmunyi? Muudi upodia ututangila ne tshiji mbishi?

¹³Udi ufikila Mvidi Mukulu munda, umujana bua tshinyi?

¹⁴Muntu udi udiamba ne tshiena ne mikiya anyi? Udi mua kuamba ne tshiena ne bualu nnganyi?[53]

¹⁵Mvidi Mukulu kena mutekemene nansha kudi batumibue bende. Diulu ditshidi anu dimueneka bu didi ne mikiya ku mesu ende.

¹⁶Kadi muntu udi muena buenzayi, matuku onsu udi wenza malu mabi, anu bu mudiye unua mayi ku dituku ku dituku.

¹⁷Unteleje, ndi ne bualu bua kukumvuija. Ndi musue kukutondela tshindi mumone.

¹⁸Ke tshivua bantu bavua bamanye malu bandongeshe. Ke tshivuabu bapete kudi bankambua babu.

¹⁹Mvidi Mukulu uvua mubape ditunga diabu nkayabu. Bantu ba bisamba bikuabu kabavua babatumina diyi to.

²⁰“Bena malu mabi badi basomba panu ne bowa, bualu dituku dia kunyoka bena tshikisu didi pabuipi.

²¹Badi bateleja anu meyi adi abakuatshisha bowa. Badi batshina muluishi, nansha diba didi bionsu mu ditalala.

²²Kabena batekemena mua kupatuka mu miidima. Badi bela meji ne: muele mmufuane kututapa.

²³Nyunyi ya mikanku neituzokole, katuedi mpata! Bakadi basue kutubutula.[54]

²⁴Dikenga ne lutatu bidi bibakuatshisha bowa, bu mudi tshituilu tshia mukalenga tshifika lukasa, tshiluisha musangu umue.”

²⁵Bualu bantu aba bavua batonuena Mvidi Mukulu wa bukole buonsu mesu.

²⁶Bantu babi aba badi banuluisha, binama, basokome muinshi mua ngabu, benda baluisha Mvidi Mukulu.

²⁷Badi badiunda, badi ne bukole bua mubidi.

²⁸Bavua baye kusomba mu bimenga bidi binyanguke, babuele mu nzubu ivua mishale kayiyi ne bantu, ikeba kupuka.

²⁹Muntu mubi, kena mua kupeta biuma kabidi, nansha yeye mubipete, kena mua kushala nabi matuku mavule to. Kena mua kuikala ne diakalenga mu ditunga.[55]

³⁰Kena mua kupatuka mu miidima nansha. Neikale bu mutshi udi kapia kosha matamba! Mueyelu wa Mvidi Mukulu neumuipate kule.

³¹Udi utekemena ku malu mabi, kena mua kukema padibu bamufuta malu mabi.

³²Bia nanku nebienzeke kayi muanji kukumbaja matuku ende a panu, anu bu lutonga ludi kaluyi luanji kusasa.

³³Nansha bu mionji ya mvinyo, idi tumuma tupona panshi tutshikale tubishi, bu mudi bilongu ku mutshi wa olive bimata bipopoke panshi bionsu.

³⁴Eyowa, bantu badi kabayi batshina Mvidi Mukulu kabakulela kabidi nansha. Kapia nekabutule nzubu yabu, bualu bavua bayasa ne biuma bipeta mu buivi.

³⁵Badi bela meji ku malu mabi, nebatele malu mabi. Badi badinga bantu, badidinga ne bobu kabidi.