Read Tshiluba Yobe 18 Bible Online

Yobe 18 - Tshiluba bible

Yobe 18

¹Pashishe Bildade muena Shuka kuakula wamba ne:

²Kadi neupuwe diba kaayi? Anji kuteleja, nanku netuyukidilangane nebe bimpe.[60]

³Yobe udi musue kutuangata bu nyama anyi? Udi ututangila bu bidingidingi anyi?

⁴Yobe, tshiji tshiebe tshidi tshikusunsula amu wewe. Amu buebe wewe, bantu bonsu badi mua kumuangala mu ditunga anyi? Mvidi Mukulu udi ne bua kumusha mikuna, bua ikushile muaba anyi?

⁵Kadi, anu muendu wa muntu mubi ke udi ujima! Ndimi ya kapia kende kayakukenka kabidi to.

⁶Diakalenga diende didi dijimina.[61] Muendu wende kawena ukenka kabidi to.

⁷Uvua wenda buludi mu njila. Mpindiewu ukadi utetuka. Malu avuaye muele meji bua kuenza, ke adi amupambula.

⁸Makasa ende neamufikishe mu bukondu. Neaye mululame, abuele mu buteyi.

⁹Buteyi nebumukuate ku tshikankanya, masoka neamukuate bikole.

¹⁰Disoka didi dimukuata, mbadisokoke mu buloba. Buteyi mbumuindile mu njila.

¹¹Nseke yonsu, bowa budi bumukuata, budi bumuipata kuonsu kudiye uya.

¹²Yeye uvua ne bukole, ukadi ufua ne nzala. Dikenga didi nseke yende yonsu.

¹³Disama mmuanabu ne lufu. Nedimukuate mubidi mujima, dimubolesha dikoba ne bidimba biende bionsu.

¹⁴Nebalue kumumusha mu nzubu muende muvuaye musombe talalaa, bua kumufikisha kudi mukalenga wa dijimba dia bafue.

¹⁵Nzubu wende neashale munda mutupu, bantu bakuabu badi mua kusombamu. Kadi nebanji kuela buanga mu lupangu luende![62]

¹⁶Nanku, nebikale bu mutshi udi mufue kuinshi ku miji, too ne ku matamba kulu.

¹⁷Bantu kabakumuvuluka kabidi mu ditunga. Kabakutela dina diende muaba nansha umue.

¹⁸Nebamuipate mu butoke, bua abuele mu miidima. Nebamuipate mu buloba budi bantu base.

¹⁹Muana nansha umue kakusangula diku diende. Muntu nansha umue wa mu muaba wabu, kakushala ne muoyi.

²⁰Bantu ba kudi diba dibuelela ne kudidi dipatukila, nebamanye bivua bimuenzekela, nebakeme, bazakala,

²¹bamba ne: “Ke muvuabu banyoka muntu mubi, udi kayi uvuluka Mvidi Mukulu nenku!”