Read Tshiluba Yobe 19 Bible Online

Yobe 19 - Tshiluba bible

Yobe 19

¹Pashishe Yobe kuandamuna ne:

²Nenunkengeshe ne miaku yenu. Nenuntatshishe ne mayuki enu too ne ku diba kaayi?

³Nukadi bamane kumpenda misangu nansha dikumi. Kanuena numvua bundu, ke panudi nuntatshisha nanku anyi?

⁴Kadi nansha meme mutupakane bulelela, tshilumbu tshidi tshinkuata anu meme!

⁵Nudi nuditambisha, numpepeja meme. Dikenga dianyi didi dinujadikila mundi muena tshibawu.

⁶Kadi numanye ne; Mvidi Mukulu ke udi mungenzele bibi ebi, ke udi munjingile bukondu buende.

⁷Pandi ngela mbila bua bangambuluishe, muntu nansha umue kena unteleja. Ndi ndomba bua bakose nsambu yanyi pa yoyi, muntu nansha umue kena undumbuluila.

⁸Mvidi Mukulu mmujike njila bua tshipitshi. Mmuntumine miidima bua nkebe njila wanyi mpange.

⁹Mmunyange lumu luanyi, mmunyenge bubanji bumvua nabu.

¹⁰Udi mumbutule nseke yonsu, bu mudibu bashimbula tshimana. Mmumushe ditekemena dimvua nadi, bu mudibu batula mutshi ne miji yawu.

¹¹Udi mumfikishe munda bikole, mmuntangile bu umue wa ku baluishi bende.

¹²Bashipianganyi bende bonsu badi bunguile muaba umue, bapanda njila bua kufika too ne kundi, bannyungulukila ne mitanda yabu.

¹³Mvidi Mukulu mmutangalaje bana betu kule, nansha badi bammanye, badi bantangila bu muenyi.

¹⁴Bana betu ne balunda banyi, mbanshiye nkayanyi, mbamane kumpua muoyi,

¹⁵nansha bantu bamvua muakidile muanyi. Nansha bena mudimu banyi bakaji, badi bantangila amu bu muntu muenyi, bu muntu udibu kabayi bamanye.

¹⁶Muena mudimu wanyi, kena mua kungitaba pandi mmubikila, nansha meme mumusengelele bishi.

¹⁷Mueyelu wanyi udi wendesha mukajanyi ku muoyi. Nkadi nkuatshisha bana banyi ba munda muenge.

¹⁸Bana batekete mene badi bampetula, banseka pandi ngakula.

¹⁹Balunda banyi ba pa muoyi badi bammone, bansesuka. Bonsu bamvua mupite kunanga badi bambenga.

²⁰Ndi ne tshinyanu lelu, mushale amu mifuba pa mifuba nkayayi,[63] mpala wanyi ukadi bu wa muntu mumane kufua.

²¹Nudi balunda banyi. Nanku nungumvuile luse. Tshianza tshia Mvidi Mukulu ke tshidi tshintuta nenku.

²²Nudi badisanga nende bua kunkengesha bua tshinyi? Kanuena banji kupungila bua kuntatshisha anyi?

²³Akia! Meme kujinga bikole bua muntu avuluke miaku yanyi, ayifunde mu mukanda.

²⁴Bayifunde ne lusongu lua ntapu, bayifikishe ne tshiamu tshifike, bua imueneke bimpe pa lubuebue.

²⁵Kadi ndi mumanye bimpe ne ndi ne muntu udi ungakuila, pa buloba ebu, yeye neambe muaku wa ndekelu.

²⁶Nansha mubidi wanyi mujima mumane kunyanguka, meme nkayanyi nendimuene Mvidi Mukulu ne anyi abidi![64]

²⁷Bushuwa, meme netumumone! Nemmutangile kayi bu muenyi kundi. Muoyi mmunshikile munda ne dindila dia dituku adi.

²⁸Nudi nuebejangana ne: tudi mua kumukengesha bishi? Tukebe malu a kumufundila nawu tshibawu!

²⁹Kadi nutshine muele wa mvita, bualu udi mua kunutapa nuenu. Bu munudi kanuyi ne luse, nudi kabidi bena tshibawu tshia lufu. Numanye ne: Mvidi Mukulu neanulumbuluishe!