Read Tshiluba Yobe 2 Bible Online

Yobe 2 - Tshiluba bible

Yobe 2

¹Dituku dikuabu, batumibue ba Mvidi Mukulu bavua bamanyisha Maweja-Nangila bivuabu bamona. Mufundianganyi kufika munkatshi muabu, umanyisha kabidi biende bivuaye mumone.

²Nanku Maweja-Nangila kumuebeja ne: — Udi utumina penyi? Mufundianganyi kuandamuna Maweja-Nangila ne: — Ndi mfumina ku diendakana pa buloba.

³Maweja-Nangila kumuebeja ne: — Uvua mumone muntu wanyi Yobe anyi? Pa buloba kapena muntu udi mufuanangane nende nansha. Yeye udi unnemeka, ungitaba. Udi muntu muimpe. Mmubenge malu mabi. Uvua munsake amu bua meme kumukengesha kapayi bualu. Kadi nansha nanku, utshidi amu undamata.

⁴Mufundianganyi kuandamuna Mvidi Mukulu ne: — Umutete mushindu mukuabu. Tshionsu tshidi muntu natshi, udi utshifila bua kudisungidila.

⁵Kadi ndi nkujadikila ne: bu wewe mua kumunyanga mubidi, neakuele mulawu bantu bonsu bumvue.

⁶Maweja-Nangila kuambila mufundianganyi ne: — Mbimpe umuenzele tshiudi musue. Kadi kumushipi to.

⁷Nanku mufundianganyi kumuka muaba uvua Mvidi Mukulu. Kutuaye Yobe disama dibi dia pa dikoba, mubidi wende mujima kunyanguka biangatshile ku dikasa too ne ku mutu.

⁸Yobe kuya kusomba mu butu, kuangula tshiyoyi tshia luesu bua kudikuanya natshi.

⁹Mukajende kumuambila ne: — Utshidi amu ulamata Maweja-Nangila muebe muuvua amu bua tshinyi? Umuele mulawu! Umutshipe. Utue!

¹⁰Yobe kuandamuna mukajende ne: — Udi wakula bu mukaji udi kayi ne lungenyi to. Patudi tupeta masanka mavule kudi Mvidi Mukulu, tudi tumuanyisha, mutudi mua kumubenga bua makenga adiye ututumina mbishi? Yobe kavua mujane Mvidi Mukulu nansha mu makenga makuabu aa avua mamukuate!

¹¹Balunda basatu ba Yobe kumvuabu lumu lua makenga onsu avua makuate Yobe. Kumukabu mu matunga abu, mena abu adi nenku: Elifaze, muena mu tshimenga tshia Temane, Bildade wa mu buloba bua Shuka, Sofare wa mu buloba bua Naama.[7] Bavua bumvuangane bua kuya kukolesha Yobe ku muoyi, ne kumusamba.

¹²Pavuabu bamutangidile pa bule, kabavua mua kumumanya kabidi to. Nanku, kudilabu, kupandabu binkutu biabu, kuelabu lupuishi mulu bua lubayile mu mutu.

¹³Pashishe, kusombabu pamue ne Yobe matuku muanda mutekete, a munya ne a butuku, kabayi bayukila nende, bualu bavua bamone ne dikenga diende ndipite bunene.