Read Tshiluba Yobe 20 Bible Online

Yobe 20 - Tshiluba bible

Yobe 20

¹Pashishe Sofare wa mu musoku wa Naama, kuambilaye Yobe ne:

²Eyi, ndi ne tshiji, meji mmanshikile. Ndi musue kukuandamuna lukasa.

³Biudi ulongesha bidi tshipendu. Kadi ndi mumanye tshindi ne bua kuandamuna.

⁴Wewe udi anu ne bua kumanya ne: Katshia Mvidi Mukulu wafuka muntu pa buloba,

⁵bantu babi kabatu basanka mutantshi mule to. Diakalenga diabu kadiena dinenga nansha.

⁶Nansha bu muntu mubi mua kulepa, kufika too ne mu diulu, mutu wende kulenga mavuba,

⁷neajimine anu bu mudi bunyawu buende. Bantu bavua bamumanye nebakonke ne: “Udi penyi?”

⁸Udi upepuka bu tshilota, ujimina, kabayi mua kumusangana kabidi to, bu mudi malu adi amuenekela muntu butuku.[65]

⁹Bantu bavua bamone muntu ewu, kabena mua kumumona kabidi nansha. Nansha muaba uvuaye musombe, kabena bamumona kabidi to.

¹⁰Uvua mushidishe biuma biende bivuaye mupete mu buivi. Bana bende ba balume, badi ne bua kulomba tshia pa luse kudi bapele!

¹¹Uvua mudiumvue ne bukole bu nsongalume. Kadi bionsu abi nebiye nende mu lukita.

¹²Mukana muende bubi budi busheme. Ke mudiye ubusokoka muinshi mua ludimi luende.

¹³Udi ubulaminyinamu mutantshi mule kayi ubulekela, mmusue amu kubuteka.

¹⁴Kadi tshiakudia tshibi atshi tshimane kubuela mu tshifu tshiende tshidi tshimusamisha munda, tshienza bu lulengu lua nyoka.

¹⁵Udi ne bua kuluka bintu bimpe bivuaye munyenge bantu. Mvidi Mukulu udi umulukisha bivuaye mumine.

¹⁶Bivuaye mulake, bivua lulengu lua nyoka. Bidi bishipangana bu lulengu lua nyoka wa ntoka, musuma muntu.

¹⁷Mu ditunga mudi misulu ya buitshi, ya mafuta ne mabele. Kadi kayena imupuekela yeye kabidi to.

¹⁸Bionsu bivuaye mupete neabipingaje kayi muanji kusanka nabi. Nansha makasa mapite avuaye mupete pa kuenda mushinga, kaena amulengelela kabidi to.

¹⁹Bualu uvua mulengulule bapele, mubakengeshe. Pa mutu pa kubashila nzubu, uvua ubanyenga uvuabu nende.

²⁰Bu mudiye kayi mua kudia kuukuta, lukuka luende ludi lukeba amu kukeba bintu bikuabu.

²¹Padiye udia, kena ushila muntu tshintu. Kadi diakalenga diende kadiena dinenga.

²²Amu diba didiye ne biuma bia bungi, ke didi dikenga dimukuata.

²³Patshidiye uwuja difu diende tente, ke padi Mvidi Mukulu umudisha tshiji tshiende, mpindiewu udi utshidia ukuta.

²⁴Nansha yeye mua kunyema muele wa mvita wa muluishi, lusongu lua tshiamu tshikunze nelumutubule.[66]

²⁵Udi utula mukete udi mumupatuke panyima. Udi umupatula lusongu luvua lumubuela too ne ku mutshima. Diakamue bowa bua lulu budi bumukuata.

²⁶Bionsu bidiye nabi bidi bibutuka. Kapia kadi muntu kayi mutemeshe,[67] kadi kamosha kamushidisha, yeye ne bende bonsu.

²⁷Diulu dileje patoke malu mabi avua muntu ewu wenza. Buloba bumufunde ku tshilumbu!

²⁸Dituku didi Mvidi Mukulu ufika munda, bintu bia muntu awu bionsu, nebipueke ne mayi.

²⁹Ke dikenga ne dinyoka, didi Mvidi Mukulu ulongoluela bantu babi.