Read Tshiluba Yobe 22 Bible Online

Yobe 22 - Tshiluba bible

Yobe 22

¹Pashishe Elifaze wa mu tshimenga tshia Temane kuambila Yobe ne:

²Muntu udi mua kulengelela Mvidi Mukulu wa bukole buonsu anyi? — Muntu awu udi mua kudilengeja amu yeye nkayende padiye muena meji!

³Kadi paudi wenza bimpe, udi wambuluisha Mvidi Mukulu anyi? Tshidi Mvidi Mukulu upeta ku malu mimpe audi wenza ntshinyi?[69]

⁴Udi wela meji ne: Mvidi Mukulu udi ukuambuluisha, ukunyoka, bualu udi umunemeka, umuitaba anyi?

⁵Nansha kakese. Kadi udi ukunyoka bua buenzayi buebe. Ne bua bilema biudi wenza amu kuenza.

⁶Bualu uvua mulombe bintu bia tshieya kudi muanenu amu patupu. Wewe kumunyenga tshilamba tshimuepele tshivuaye natshi.[70]

⁷Uvua muimine muntu uvua ne nyota mayi a kunua. Uvua mupala uvua ufua ne nzala biakudia.

⁸Kadi wewe kuanyisha bua bantu badi ne bukole bakuate ditunga, bua bantu badi baditambisha bambe ne: ke muetu emu.[71]

⁹Uvua muipate bakaji bankamba bumuke bianza bitupu. Uvua mukengeshe bana ba nshiya, muibe bintu biabu.

¹⁰Ke paudi ne baluishi bebe nseke yonsu. Ke padi bowa bupite bunene bukukuata diakamue.

¹¹Nenku kuena mumone kabidi tshintu, bualu miidima idi ikubuikila. Mayi adi apasalala adi akubutula.

¹²Udi mumanye mudi Mvidi Mukulu mu diulu muamua, mudiye mumone mitotu, nansha yoyi minangapale mulu mule.

¹³Kadi wewe udi amu webeja ne: “Tshidi Mvidi Mukulu mua kumanya ntshinyi? Udi mua kukosa nsambu yetu padi mavuba amusokoka anyi?

¹⁴Mavuba adi amupangisha mua kamonyi bimpe. Nanku Mvidi Mukulu kena umona bualu nansha bumue, padiye wendakana mu diulu.”

¹⁵Udi musue kulonda anu njila ya kale, ivua bantu babi batambakena anyi?

¹⁶Bobu bakafua matuku abu kaayi manji kukumbana, amu bu tshimana tshidi mayi upula.

¹⁷Bantu aba bavua bamba ne: “Mvidi Mukulu atushile muaba! Tusombe talalaa! Udi wa bukole buonsu, kadi tshidiye mua kutuenzela ntshinyi?[72]”

¹⁸Kadi amu yeye ke uvua munemeshe meku abu. Tshiena mua kumvua meji adi bantu babi bela.[73]

¹⁹Bantu bimpe badi basanka padibu bamona mudibu babutula bantu babi. Bantu badi kabayi ne bualu, nebaseke amu kuseka.

²⁰Nebambe ne: “Baluishi betu mbabutuke! Kapia kashidishi bionsu bivuabu bashiye.”

²¹Utue ndondu ne Mvidi Mukulu. Nanku bionsu nebiende bimpe. Ke muudi mua kupeta diakalenga tshiakabidi.

²²Padi Mvidi Mukulu ukulongesha, witaba tshidiye wamba. Lama miaku yende munda muebe.

²³Wewe mupingane kudi wa bukole buonsu, neakufululule. Umushe malu mabi onsu, audi wenza kuebe.

²⁴Imansha tshiamu tshia mpawungi tshiudi natshi. Nansha utshiele mu mayi manene munkatshi mua mabue.

²⁵Amu Mvidi Mukulu wa bukole buonsu, ke tshiamu tshiebe tshia mpawungi, ke tshiamu tshiebe tshitoke tshia mushinga mukole.

²⁶Nanku, neumone mua kutekemena kudi Mvidi Mukulu wa bukole buonsu, neumujoje amu yeye ne mimuemue pa mpala pebe.

²⁷Paudi umutendelela, umuteleje, nanku neukumbaje malaya auvua mumulaye.

²⁸Neupete dikasa dimpe mu bionsu biudi musue kuenza. Kuebe kuonsu kuudi uya, nekuikale amu diakalenga.

²⁹Bualu Mvidi Mukulu udi unyanga midimu, idi bena ditambisha[74] basue kuenza. Kadi udi wambuluisha bantu badi badipuekesha.

³⁰Udi usungidila bantu badi kabayi ne bualu. Udi upandisha badi kabayi ne katoba ku bianza,[75]