Read Tshiluba Yobe 29 Bible Online

Yobe 29 - Tshiluba bible

Yobe 29

¹Pashishe Yobe kuamba kabidi ne:

²Bu meme mua kuikala mupingane ku kale, mu matuku avua Mvidi Mukulu mundame,

³diba divua Mvidi Mukulu untemeshila muendu wende, butoke buawu bungambuluisha bua meme kupita mu miidima!

⁴Mvua mudiumvue bu muntu mukulumpe, bualu Mvidi Mukulu mulunda wanyi, uvua ulama nzubu wanyi.

⁵Wa bukole buonsu utshivua nanyi. Bana banyi ba balume bavua bimana bangela munkatshi.

⁶Musangu awu, ngombe ne mbuji bivua bimpetesha mabela a bungi. Tshikaminu tshianyi tshivua tshipatula mafuta, bu musulu, kauyi ukama.

⁷Pamvua nya mu tshimenga mu tshipangu tshia bakulu, mvua nsomba nabu ku tshibuelelu tshia tshimenga.[99]

⁸Pavua bansongalume bammona, bavua banshila muaba. Bakulakaje bavua bajuka kulu ne kanemu, bimana.

⁹Bakulu bavua bapuwe, bateka munu ku mishiku, bambila bantu bua bapuwe pabu kabidi.

¹⁰Nansha bamfumu mene bavua bapuekesha diyi, benda bapuwa.

¹¹Bonsu bavua bangumvua, bavua bangela kalumbandi. Pavuabu bammona, bavua bangangata ne mushinga.

¹²Mvua muambuluishe mukengi uvua ungela mbila, nansha muana nshiya uvuabu kabayi bavuluka.

¹³Bantu bavua bapunga ne lufu, bavua banjingila diakalenga. Meme kusankisha bakaji bankamba.

¹⁴Meme kuvuala buakane bu tshilamba. Kanemu ka tshintu tshia bende kavua mu tshinkutu ne mu tshifulu tshianyi.

¹⁵Mvua bu mesu a mpofu, nansha bu makasa a mutebuki.

¹⁶Meme kushala tatu wa bakengi. Meme kuambuluisha benyi mu ntatu yabu yonsu.

¹⁷Meme kupola menu a bena buenzayi bonsu. Meme kubanyenga tshionsu tshivuabu natshi mukana.

¹⁸Nanku meme kudiambila ne: “Nemfuile mu nzubu muanyi, mumane kukumbaja matuku mavule panu bu a nyunyi wa Fenikse.[100]

¹⁹Ndi bu mutshi udi muele miji mu mayi, tshitalela tshia butuku tshidi tshipuekela pa matamba awu.

²⁰Nempete amu lumu lupialupia. Ndi ne bukole bu bua buta budibu banana.”

²¹Diba adi, bantu bavua banteleja, bindila. Bavua bapuwa bua meme kuamba tshimvua muele meji.

²²Pamvua njikija kabavua batontolola nansha. Miaku yanyi ivua ibuela munda muabu bu mayi a mvula.

²³Bantu bavua bangindila bu mudibu bindila mvula. Bavua bantekemena bu mudibu batekemena mvula wa kumpala.

²⁴Pamvua nseka, bavua basanka bikole, mimuemue ya pa mpala panyi ivua ibakolesha ku muoyi.

²⁵Mvua ntunga mulongu wabu, mbaleja njila. Mvua bu mukalenga udi ulombola bena mvita bende. Muntu uvua ne dibungama uvua mumusambe mmeme.