Read Tshiluba Yobe 34 Bible Online

Yobe 34 - Tshiluba bible

Yobe 34

¹Elihu kuamba kabidi ne:

²Nuenu bena meji nuteleje muyuki wanyi. Nuenu badi bamanye malu, teyayi matshi.

³Mudimu wa ditshi, nkujingulula malu, bu mudi tshilakalaka tshijingulula buimpe bua biakudia.[120]

⁴Nenku, tujingululayi malu adi mimpe. Tukebe bonsu pamue muaba udi bulelela.

⁵Yobe udi wamba ne: “Tshiena ne bualu bubi bundi muenze nansha. Kadi Mvidi Mukulu kena muanyishe malu makane andi ngenza to.

⁶Nansha meme tshiyi ne bualu, kena ukosa nsambu yanyi pa yoyi to.[121] Udi untapa mputa, ukeba kunshipa anu patupu.”

⁷Yobe mmuntu wa mushindu kaayi? Udi usendeka Mvidi Mukulu, anu bu mudi muntu unua mayi.

⁸Udi udia bulunda ne bena buenzayi, wenda mu njila pamue ne bantu babi.

⁹Uvua wamba ne: “Muntu udi utekemena kudi Mvidi Mukulu, kena upeta tshia nsongu.”

¹⁰Nuenu bena meji, nunteleje. Mvidi Mukulu udi mua kuenza bibi anyi? Wa bukole buonsu udi mua kukengesha muntu anyi?

¹¹Nansha kakese! Kadi Mvidi Mukulu udi upingajila bantu bivuabu benze. Udi ubafuta bilondeshile midimu ivuabu bakuate.[122]

¹²Mvidi Mukulu kena wenza bibi musangu nansha umue. Katshia Mvidi Mukulu wa bukole buonsu kena muanji kukengesha muntu.

¹³Kudi muntu udi mumupeshe bumfumu anyi? Uvua muteke buloba mu bianza biende nnganyi? Muntu nansha umue, amu Mvidi Mukulu nkayende ke udi wenza bionsu.

¹⁴Bu Mvidi Mukulu mudivuluke amu yeye, utunyenga mueyelu wende wa muoyi,

¹⁵nyama ne bantu, bionsu bivua ne bua kufua musangu umue. Muntu uvua ne bua kupingana amu lupuishi.

¹⁶Yobe, paudi ne lungenyi unteleje, ela meji bimpe ku tshindi ngamba.

¹⁷Mvidi Mukulu yeye muikale ne lukinu, uvua mua kulombola diulu ne buloba anyi? Wewe, udi mua kudiwula muena Bukole buonsu, muena malu makane anyi?

¹⁸Amu yeye nkayende udi mua kuambila mukalenga[123] ne: “Udi mutambakane!” nansha bamfumu ne: “Nudi bena tshibawu.”

¹⁹Amu Mvidi Mukulu kena ne kansungasunga, kena utshina bamfumu, kena unemeka mubanji kumpala kua mupele. Bualu uvua mubafuke bonsu udi amu yeye mene.

²⁰Mundankulu lufu ludi mua kubakuata mu mpukapuka, kabayi bamanye. Bantu badi batomboka, bamfumu badi bafua. Mvidi Mukulu udi ushipa mukalenga wa tshikisu, kayi nansha ukuata mudimu bikole.

²¹Mvidi Mukulu udi ukenketa luendu lua bantu, bualu udi ukonkonona bionsu bidibu benza.

²²Miidima nansha yoyi mikole bishi, kayena mua kusokoka benji ba malu mabi, bua Mvidi Mukulu kabamanyi.

²³Mvidi Mukulu kena ne bua kubikila muntu ku tshilumbuluilu,[124] kumulumbuluisha mutantshi mule nansha.

²⁴Udi umusha bakalenga kayi nansha ulondolola malu, udi upingaja bakuabu pa miaba yabu.

²⁵Bualu udi mumanye bionsu bidibu benza. Nanku udi mua kubatonkola butuku, nansha kubazaza mene.

²⁶Udi ubashipa bu bena tshibawu, bantu bonsu batangile.

²⁷Bualu bantu abu bavua bamubenge, balengulula mikenji yende yonsu.

²⁸Bu muvuabu bakengesha bakengi ne bapeta, bobu abu bavua bela mbila kudi Mvidi Mukulu, bua abambuluishe. Nanku, Mvidi Mukulu kumvua mbila ayi.

²⁹Kadi padi Mvidi Mukulu kayi unyoka muntu, udi mua kumupisha nnganyi? Yeye musue kusokoma, udi mua kumumona nnganyi?

³⁰Padi Mvidi Mukulu musue bua muntu mubi wa tshikisu,[125] ashale mukalenga wabu, tshidi bena matunga mua kuenza ntshinyi?

³¹Muntu udi mua kuambila Mvidi Mukulu ne: “Mvua mutupakane. Tshiena musue kuenza kabidi bibi to.

³²Undeje bilema bindi tshiyi mumone meme, meme muenze bibi, tshiena mua kuenzulula kabidi to.”

³³Muntu wa nanku, Mvidi Mukulu udi ne bua kumunyoka anyi? Bu muudi wewe ubipisha Mvidi Mukulu, udi anu musue bua amunyoke anyi? Udi ne bua kuandamuna ku lukonku elu, ki mmeme nansha, kadi anu wewe. Nanku utuambile meji audi nawu pa bualu ebu.

³⁴Bantu ba meji, badi bitaba tshindi ngamba. Badi bateleja bamanya malu, nebanyishe miaku yanyi ya ne:

³⁵“Yobe udi wakula kayi mumanye bualu. Miaku yende nya tshianana.

³⁶Nutete anu bidiye wamba, nenumone ne udi wakula anu bu bantu babi.

³⁷Yeye mumane kuenza bibi, ukadi utombokela kabidi Mvidi Mukulu, munkatshi muetu ukadi ujula mpata, bualu udi uluisha amu kuluisha Mvidi Mukulu.”