Read Tshiluba Yobe 35 Bible Online

Yobe 35 - Tshiluba bible

Yobe 35

¹Elihu kuamba kabidi ne:

²Yobe, paudi wambila Mvidi Mukulu ne: tshiena ne bualu, udi wenza bimpe anyi?

³Wewe udi umukonka ne: nansha meme tshiyi ne bualu, bidi bindengelela ku tshinyi? Meme kabidi ndi mpeta tshinyi?

⁴Nanku, meme nenkuandamune ku lukonku elu. Nengandamune kabidi ya balunda bebe.

⁵Ujoje mavuba, utangile tshibuashibuashi, kabiena bikupite ku bule anyi?

⁶Paudi wenza bibi udi ukengesha Mvidi Mukulu anyi? Bilema biebe bionsu bipite bungi, bidi bimuenzela tshinyi? Tshintu nansha tshimue.

⁷Paudi wenza bimpe, udi wambuluisha Mvidi Mukulu anyi? Tshidiye upeta kuudi ntshinyi?

⁸Bimpe nansha bibi biudi wenza, bidi biambuluisha nansha bikengesha anu bantu nebe.[126]

⁹Padi bena tshikisu babakengesha bikole, bantu badi batua mikemu. Badi bela mbila bua bantu babambuluishe.

¹⁰Kadi muntu nansha umue kena ukonka ne: “Mvidi Mukulu uvua mumfuke udi penyi? Yeye udi utuimbisha misambu nansha butuku.[127]

¹¹Udi utulongesha mudiye kayi ulongesha nyama. Udi utupa meji adi nyunyi kayiyi nawu.[128]”

¹²Badi balomba diambuluisha bua kuluisha bena ditambisha, bantu babi. Kadi kena ututeleja nansha.

¹³Nansha tuetu bela mbila, Mvidi Mukulu wa bukole buonsu kena utumvua, kena ututeleja ne ntema to.

¹⁴Wewe Yobe, udi wamba ne: tshiena mumone Mvidi Mukulu to. Kadi indila katupa, tshilumbu tshiebe tshikadi kumpala kuende.

¹⁵Udi wela meji, nansha yeye ne tshiji, kena mua kukunyoka, kabidi kena ulondolola bibi bidi bantu benza anyi?

¹⁶Kadi biudi wewe Yobe wamba, bidi amu bia patupu, bidi bimueneka ne udi wakula amu kuakula, kuyi mumanye malu audi wamba.