Read Tshiluba Yobe 37 Bible Online

Yobe 37 - Tshiluba bible

Yobe 37

¹Pandi mmona bukole bua Mvidi Mukulu, muoyi wanyi udi utuuta munda bikole, ukeba kutuka.

²Telejayi, telejayi, mudi diyi dia Mvidi Mukulu dikungula, mudi makubakuba apatukila mukana muende.

³Mvidi Mukulu udi utuma mikenya ya mvula, idi ifika ku ntengu yonsu ya buloba.

⁴Mukungulu wa mvula udi ulonda mikenya, udi utuma tshiona tshikole, diakamue Mvidi Mukulu udi upenyisha mikenya mikuabu.

⁵Tshiona tshikole tshidi tshikemesha bantu, bualu ntshishima tshidibu kabayi mua kujingulula.

⁶Mvidi Mukulu udi utumina mvula wa mabue diyi ne: “Uloke pa buloba.” Udi ulokesha mvula mukole, nansha wa tshipupu mene.

⁷Udi upumbisha bantu bua kuenza mudimu, bua bantu bonsu bakeme mudimu udiye yeye ukuata.[137]

⁸Nansha nyama idi ibuela mu bisokomenu biayi, ishalamu misokome munda mua buloba.

⁹Mvunde mukole udi umuka kuinshi kua ditunga. Lupepele lua mashika ludi lufuma ku mutu kuadi.

¹⁰Mueyelu wa Mvidi Mukulu udi wandamuna mayi, enza mabue a mashika, mayi aa adi akola bu tshiamu.

¹¹Mvidi Mukulu udi uwuja mavuba ne mayi, watuma ne mikenya ya mvula munda muawu.

¹²Ke mudiye watangalaja eku ne eku, bua akumbaje bionsu bidiye musue mu matunga onsu a pa buloba.

¹³Mvidi Mukulu udi ukumbaja tshidiye musue pa buloba, nansha bua kunyoka muntu, nansha bua kumuenzela bimpe.[138]

¹⁴Yobe, bionsu ebi ubiteleje ne ntema. Juka, utangile malu a dikema adi Mvidi Mukulu muenze.

¹⁵Udi mumanye mudi Mvidi Mukulu ulombola bionsu ebi anyi? Udi mujingulule mudi mavuba ela mikenya anyi?

¹⁶Udi mumanye mudi mavuba malembelele mulu anyi? Amu udi mumanye bionsu, ke udi mua kuenza tshishima tshia nanku.

¹⁷Wewe, padi lupepele lufuma kuinshi kua ditunga lutuuta, luya ludi lukutonda. Udi ukeba kuvula bilamba.

¹⁸Nanku wewe uvua mua kuambuluisha Mvidi Mukulu, diba divuaye mufuke tshibuashibuashi tshikole bu lumuenu, luenza ne tshiamu anyi?

¹⁹Utumanyishe tshitudi mua kuambila Mvidi Mukulu. Katuena natshi. Mu mutu muetu mudi mutupu.

²⁰Pandi nyukila, badi ne bua kumumanyisha anyi? Badi ne bua kumuambila ne: kampanda uvua muakule anyi?

²¹Misangu mivule kulu kudi kufika, mavuba adi asokoka diba. Kadi diakamue, lupepele ludi mua kujuka kutokesha diulu.

²²Butoke budi bukenka, bufuma ku mutu kua ditunga. Lumu lua Mvidi Mukulu ludi lutukuatshisha bowa.

²³Mvidi Mukulu mmuena bukole buonsu. Katuena mua kusemena pabuipi nende. Udi munene. Bidiye wenza bionsu bidi bimpe. Kena ukengesha muntu. Tshidiye ne bua kutuambila ntshinyi?[139]

²⁴Ke mudi bantu ne bua kumutshina. Kadi bonsu badi baditambisha ne tudi bena meji, kena ubamona, kena nabu bualu.