Read Tshiluba Yobe 4 Bible Online

Yobe 4 - Tshiluba bible

Yobe 4

¹Pashishe, Elifaze muena mu tshimenga tshia Temane kuambila Yobe ne:

²Bu meme mua kukuambila bualu, bidi mua kukutonda[11] anyi? Kadi udi mua kupuwa muaba ewu nganyi?

³Wewe uvua mulongeshe bantu ba bungi, mukoleshe bantu bavua bapungile mu maboku.

⁴Wewe uvua wimanyika kulu bavua bakeba kudishinda. Uvua ujula bavua bapungile ne bujitu.

⁵Lelu dikenga dikukuata, ukadi uteketa! Padibu bakulenga pambidi, ukadi uzakala!

⁶Bu muuvua mulamate Mvidi Mukulu, udi amu mua kutekemena kudiye. Bu muuvua muleje bantu tshilejilu tshimpe, kutekeshi mu maboku, kupinganyi tshianyima nansha.

⁷Ela meji bimpe, ukadi mumone bantu bakane babutuka anyi? Bena muoyi muimpe, badi mua kujimina anyi?

⁸Meme nkadi mumone ne: Padi muntu ukuna bubi, nansha umiamina makenga, udi unowa amu bubi ne makenga.

⁹Badi benza nanku, badi bakeba tshiji tshia Mvidi Mukulu. Tshidi tshibashipa, tshiya nabu bu mudi lupepele lua mvunde luenza.

¹⁰Badi bakungula bu mudi nyama ya ntambue. Kadi Mvidi Mukulu udi ubapuwisha, upola menu a nyama ya lonji eyi.

¹¹Padi ntambue ipanga tshiakudia, bana bayi badi batangalaka, bafua.

¹²Musangu mukuabu mukenji kufika kundi mu musokoku, matshi anyi kumvua anu dinunganyi dikese.

¹³Bivua amu bu tshilota tshidi tshiluila[12] bantu butuku, tshinyanga tulu tukole tuvuabu natu.

¹⁴Bowa buvua bunkuate bikole. Bidimba bionsu kunzakala.

¹⁵Lupepele lua mashika kumpitshila mu mpala, mubidi mujima kumvuayila.

¹⁶Meme kumona tshintu bu muntu, tshimana muaba awu, tshivua mua kutshijingulula bimpe nansha. Meme kumvua diyi ditekete diamba ne:

¹⁷“Muntu wa panu, ku mesu a Mvidi Mukulu, udi mua kudiamba ne: Ndi muntu muakane anyi? Muntu udi mua kubinga kumpala kua Mvidi Mukulu anyi?

¹⁸Mvidi Mukulu udi mua kudiwula bena mudimu bende, udi usangana bilema nansha kudi batumibue bende.

¹⁹Nanku, mmunyi mudiye kayi mua kudiwula bantu badi basomba pa nzubu ya pa buloba, bana bavuabu bafimba ne diima, badibu mua kudiata bu tunkenene.

²⁰Biangatshile mu dinda too ne ku dilolu, bantu badi bapita bafua, kabayi nansha babamona kabidi.

²¹Badi bakosa mionji ya ntenta wabu wa pa buloba.[13] Badi bafua kabayi bajingulula bualu.”