Read Tshiluba Yobe 40 Bible Online

Yobe 40 - Tshiluba bible

Yobe 40

¹Maweja-Nangila kubikila Yobe kumukonka ne:

²Wewe udi musue kuelangana mpata[154] pa malu adi Mvidi Mukulu wa bukole buonsu mulongolole anyi? Utshidi umuasa tshilumbu anyi? Neupuwe anyi, peshi utshidi ne bua kuandamuna ku bindi ngamba.

³Nanku Yobe kuandamuna Maweja-Nangila ne:

⁴Ndi muntu wa tshianana, tshindi mua kuandamuna kabidi ntshinyi? Ndi mbuikila mukana ne tshianza mpuwa.

⁵Mvua muakule, kadi tshiakuakula kabidi nansha. Mvua mukoleshe malu. Kadi tshiakutungunuka kabidi nanku to.

⁶Munkatshi mua tshipepele tshikole, Maweja-Nangila kuandamuna Yobe ne:

⁷Neudi mulume, suika mukaba, nenkukonke bualu ungandamune.

⁸Udi ubenga mundi nkosa nsambu anyi? Udi musue kumpisha bua wewe kubinga anyi?

⁹Udi ne bukole bundi meme nabu anyi? Diyi diebe ndikole bu dianyi anyi?

¹⁰Pawikala muena mulongu nanyi, leja lumu luebe ne ndunene, vuala butumbi ne buneme.[155]

¹¹Leja bantu tshiji tshiebe tshinene. Tangila badi baditambisha, ubele panshi!

¹²Ujoje bena ditambisha bonsu, ubazaze muaba udibu, uboze bena malu mabi.

¹³Ubajike bonsu pamue mu lukita, ubatume mu kandondu ka bafue.

¹⁴Diba adi nenkuele ka lumbandi, bualu udi muditshimuine nkayebe!

¹⁵Tangila nguvu, nyama wa tshidika ewu: Ndi mumufuke bu mundi mukufuke wewe. Udi udia anu bisosa, bu nyama wa ngombe.

¹⁶Kadi tangila bukole budiye nabu! Katshila dikanda dia misunya ya mu difu diende.

¹⁷Udi utandabaja mukila wende, wenza bu mutshi wa sedre. Mijilu minene ya bibelu biende idi mikole be.

¹⁸Mifuba yende idi mikole bu tshiamu tshikunze. Mbadi yende idi bu milonda ya tshiamu tshia kabanda.

¹⁹Ku bionsu bindi muenze, anu yeye ke udi mupite mikuabu. Meme nkayanyi, ke Mufuki wende, ndi mua kumutekesha.[156]

²⁰Udi upeta biakudia[157] biende pa mukuna, padi nyama ya lonji inayila.

²¹Kadi udi ulala muinshi mua mingonga, usokoma mu malenga a mu tshisense.

²²Udi wikishila mu dileji dia mingonga, dia mitshi idi ku muelelu wa musulu.

²³Nansha musulu ne muenji mukole bishi, kena upampakana to. Nansha mayi muwule apitshila ku mishiku yende, kena unyema to.

²⁴Padiye mutabale, udi mua kumukuata nnganyi? Badi mua kumukuata mu buteyi, kumutubula diulu ne mutshi anyi?

²⁵Udi mua kuloba, kukuata ngandu ku ndobu nnganyi? Udi mua kusuika ludimi luende ne muonji anyi?[158]

²⁶Udi mua kumuela muonji mu diulu, kutubula lubanga luende ne mulonda anyi?

²⁷Udi wela meji ne: udi mua kukusengelela anyi? Udi mua kukuambila miaku ya kalolu anyi?

²⁸Udi mua kutua ndondu bua ashale mupika webe too ne ku lufu luende anyi?

²⁹Udi mua kunaya nende bu muudi unaya ne nyunyi anyi? Udi mua kumusuika bua bana bebe ba bakaji banaye nende anyi?

³⁰Balobi nansha bobu badisanga, badi mua kumusumbisha anyi? Badi mua kumukosa bitupa, kubipana anyi?

³¹Udi mua kutubula tshiseba tshiende ne milonda anyi? Nansha mutu wende ne musongolu anyi?

³²Idikija! Umulenge pambidi bu udi umukeba mvita! Kuakuenza musangu muibidi to! Neuvuluke mvita yebe nende too ne ku lufu luebe!