Read Tshiluba Yobe 42 Bible Online

Yobe 42 - Tshiluba bible

Yobe 42

¹Nanku Yobe kuandamuna Maweja-Nangila ne:

²Ndi mumanye ne: kakuena tshidi mua kukukolela, udi mua kukumbaja tshionsu tshiudi musue.

³Wewe kungebeja ne: muudi wela mpata pa malu andi mulongolole, muudi wakula pa malu audi kuyi mujingulule mbishi?[163] Eyowa, ndi ntonda ne: mvua muakule pa malu adi mampite, pa malu a dikema amvua tshiyi mua kumvua.

⁴Wewe kuamba ne: “Teleja ndi ngakula. Nenkuebeje malu, wewe mungandamune.[164]”

⁵Mvua mukumanye amu bualu bantu bakuabu bavua bandongeshe. Kadi mpindiewu meme kukumona ne anyi abidi.

⁶Ke pandi ngunwua bundu bua bionsu bimvua muambe. Ndi nyingalala nsomba mu lupuishi ne mu butu.

⁷Maweja-Nangila mumane kuyukila ne Yobe, kuambilaye Elifaze wa mu tshimenga tshia Temane ne: — Wewe ne balunda bebe babidi, ndi munufikile munda. Bualu kanuena balongesha mu bulelela malu adi antangila, bu muvua muntu wanyi Yobe muenze.

⁸Nanku mpindiewu nuangate nyama ya ngombe milume muanda mutekete, ne mbuji ya bimpanga muanda mutekete. Nuye nabi kudi muntu wanyi Yobe. Nulambule nyama eyi bu milambu ya kuosha bua kudikobolola. Muntu wanyi Yobe neantendelele bualu buenu. Nengitabe dilomba diende. Tshiakununyoka bua bibi binuvua benze. Bualu kanuvua balongeshe malu anyi mu bulelela bu muvua muntu wanyi Yobe muenze.

⁹Nanku, Elifaze wa mu buloba bua Temane, Bildade wa mu buloba bua Shuka ne Sofare wa mu buloba bua Naama kuenzabu bivua Mvidi Mukulu mubambile. Pashishe Maweja-Nangila kuitaba ditendelela dia Yobe.

¹⁰Yobe mumane kutendelela Mvidi Mukulu bua balunda bende abu, Maweja-Nangila kumupingajila bintu biende anu bu muvuabi kale.[165] Kuvudijaye bintu abi misangu ibidi bu muvuabi kale.

¹¹Nanku, Yobe kuakidila bana babu bonsu ba balume ne ba bakaji, ne bonsu bavua bamumanye kale, kufikabu bua kumusamba. Bavua badila ne Yobe kaba kamue, bamukolesha ku muoyi bua makenga onsu avua Maweja-Nangila mumutumine. Pashishe muntu yonsu uvua umushila lukanu lutoke[166] lua mushinga mukole, ne kakanu ka tshiamu tshia mpawungi.

¹²Maweja-Nangila kuela Yobe lupemba, kupitaye ne muvuaye kale. Yobe kupeta mikoku binunu dikumi ne binayi, tumelu binunu bisambombu, ngombe milume ne mikaji tshinunu ne mpunde mikaji tshinunu.

¹³Uvua kabidi mulele bana ba balume muanda mutekete, ba bakaji basatu.

¹⁴Uvua muinyike muanabute mukaji ne: Yemima, muibidi ne: Keziya ne muisatu ne: Keronapuka.[167]

¹⁵Mu ditunga dijima kabavua basangana bakaji balengele bu mishika nkunde ya Yobe. Tatuabu uvua mubalamine bumpianyi bua momumue ne bua bana bende ba balume.

¹⁶Yobe kushala kabidi ne muoyi bidimu lukama ne makumi anayi. Kumonaye bana bende, bikulu bende too ne ku ndelanganyi ya ku mulongu muinayi.

¹⁷Yobe kufua, mulale panu muboboke.