Read Tshiluba Yobe 6 Bible Online

Yobe 6 - Tshiluba bible

Yobe 6

¹Pashishe Yobe kuamba ne:

²Ndi musue bapime dikenga dianyi, bateke ntatu yanyi yonsu pa tshitempelu.

³Nebipite lusenga lua ku mayi manene ku bujitu. Ke pandi ngakula tshiakulakula.

⁴Eyowa, Mvidi Mukulu wa bukole buonsu, mmungase miketa. Lulengu luayi ndumbuele mu lungenyi. Bionsu bidi Mvidi Mukulu mulongolole bua kukuatshisha nabi bantu bowa, bidi binyunguluke biela mualu wa mvita.

⁵Padi bisosa lutenda, nyama ya mpunde mu mpata idi mua kudila anyi? Nyama ya ngombe idi mua kuasa muadi padiyi ne bisosa bivule anyi?

⁶Badi mua kudia biakudia bitalala kabiyi biela luepu anyi? Badi mua kudia mulungulungu wa diyi mutoke, kauyi muipika, wewe kumvua bimpe anyi?

⁷Tshiena mua kudia bintu nanku to. Dikenga dianyi didi tshiakudia tshidi katshiyi tshisankisha.[22]

⁸Mvidi Mukulu kena umpesha, tshindi ndomba bua tshinyi? Ankumbajile tshindi njinga.

⁹Mbimpe Mvidi Mukulu anzaze, alekele kundama, ambutule.

¹⁰Diba adi nansha meme muikale ne makenga makole, nentupike nsanka, nenkoleshe muoyi, bualu tshiena mubenge mikenji ya Mvidi Mukulu wa tshijila.

¹¹Kadi tshiena ne bukole bua kumvua makenga kabidi. Nenshale ne muoyi bua tshinyi? Tshindi mua kutekemena kabidi ntshinyi?

¹²Ndi ne bukole bu bua dibue anyi? Mubidi wanyi udi wa tshiamu tshikunze anyi?

¹³Meme nkayanyi tshiena kabidi ne bukole nansha bukese. Tshiena mumone udi mua kungambuluisha.

¹⁴Muntu udi ukenga, mulunda wende udi ne bua kumusamba. Tshianana, kudi njiwu ya kubengaye kulamata Mvidi Mukulu wa bukole buonsu.[23]

¹⁵Balunda banyi bavua bandinga bu mudi musulu mua kudinga bantu. Musulu uvua ne mayi mavule, mpindiewu ukadi mume.

¹⁶Ku ndekelu kua tshikondu tshia mashika, udi ne mayi a bungi mafike, bualu mayi avua afuma ku mabue a mvula, ne ku neje.

¹⁷Kadi padi tshikondu tshia luya tshituadija, misulu idi yuma, mayi adi akama bua bukole bua munya.

¹⁸Bena ngendu badi ne nyota, badi bapuka bua kukeba mayi, kadi badi babuela mu tshipela, bafuilamu.

¹⁹Bena ngendu ba ku Tema ne ba ku Saba,[24] badi bakeba mayi, baatekemena ne muoyi mujima.

²⁰Kadi, badi ne kanyinganyinga, bualu bavua bela meji ne: netupete musulu wa mayi. Kadi bobu bamane kufika, kusanganabu musulu mume.

²¹Nuenu kabidi, nudi nundinga, bu mudi misulu eyi[25] idinga bantu. Panudi numona dikenga dianyi, nudi nunkuatshisha bowa.

²²Ndi munulombe bua nuenu kunsankisha ne tshintu, nansha bua nuenu kumbuejila bintu bienu anyi,

²³bua mpatuke mu bianza bia baluishi banyi, bua ngumuke kudi muena tshinyangu udi unkengesha anyi?

²⁴Mbimpe, nundongeshe, nundeje mumvua mutupakane. Nanku nempuwe, nennuteleje.

²⁵Panudi nubela muntu pa bualu, neateleje bimpe, kadi biakulakula bienu bidi mua kuenzela muntu tshinyi?

²⁶Nudi nungasa tshilumbu bua miaku imvua muambe, kanuena numona ne nya muntu udi kayi mua kutekemena kabidi tshintu anyi?

²⁷Nudi mua kutshinka bua kupeta muana nshiya, kumushintakaja ne mulunda wenu wa pa muoyi.

²⁸Bu nuenu basue, nuntangile mu mpala, nungambile, ndi mushime anyi?

²⁹Kanumpishi, tshiena ne bualu to.

³⁰Miaku yanyi idi amu mimpe. Ntshidi mumanye mua kusunguluja tshidi tshimpe ne tshidi tshibi.