Read Tshiluba Yobe 8 Bible Online

Yobe 8 - Tshiluba bible

Yobe 8

¹Ke Bildade wa mu tshimenga tshia Shuka, kukonka Yobe ne:

²Neutuambile malu a nanku too ne ku diba kaayi? Biudi wamba bidi bia tshianana. Udi utantamana amu patupu.

³Udi muitabe bulelela ne: Mvidi Mukulu, udi mua kubenga malu makane anyi? Wa bukole buonsu udi mua kupanga kulonda meji mimpe anyi?

⁴Bana bebe bavua bamuenzele bibi. Ke pavuaye mubanyoke, bilondeshile malu avuabu bamuenzele.

⁵Kadi wewe paudi ukeba Mvidi Mukulu, utendelela wa bukole buonsu,

⁶mu tshikosu, kuyi ne bubi buudi muenze, Mvidi Mukulu neakuambuluishe pa lukasa, neakuangate ne mushinga.

⁷Bintu biebe bia kale biuvua nabi, nebimueneke bu bikese. Paudi ubifuanyikija ne bipiabipia biudi mua kupeta.

⁸Ukonke bankambua bavua bamane kuikala kumpala kuetu. Umanye bivua batatu batulongeshe.

⁹Tuetu mbatulele amu makelela ewu, katuena bamanye bualu nansha bumue. Matuku etu a panu adi apita bu mudi mundidimbi, adi bu dileji didi dijimina.

¹⁰Kadi bankambua betu kabena mua kukulongesha, kukumvuija bivuabu balonga panu anyi? Nebabuelele tusumuinu ne:

¹¹“Ntupu idi imena amu mu lunteka. Dilenga kadiena mua kumena muaba udi kauyi mayi.

¹²Padibi bipanga mayi, bidi bidianza kuma kumpala kua bisosa bikuabu bionsu, muntu kena mua kubikosa, kukuata nabi mudimu.”

¹³Ke bidi bienzekela bantu badi bapua Mvidi Mukulu muoyi. Bantu badi bamutombokela kabena mua kutekemena tshintu.

¹⁴Badi bu nyunyi idi ikeba kubuka, kadi mbayikose nsala. Muaba udibu basue kunyemena, udi amu bu lutandetande.[32]

¹⁵Padibu banyema ku nzubu wa nanku, bionsu bidi biupuka. Badi beyemena butantande badishinda nabu panshi.

¹⁶Badi bu mutshi udi ukolela mu munya mukole. Udi muoluele matamba awu mu lupangu.

¹⁷Udi muelele miji yawu ne mu mabue, idi ifika too ne munda mua mbuebue.

¹⁸Kadi bu wewe mua kutula mutshi awu muaba uvuawu, bantu kabena mua kuitaba ne: muaba ewu uvua mutshi to.

¹⁹Ke mudi disanka didi bantu abu babi nadi. Bantu bakuabu nebajuke, nebangate muaba wabu.

²⁰Mvidi Mukulu kena mua kubenga muntu udi kayi ne bualu to. Kadi kena mua kuambuluisha muntu mubi nansha.

²¹Mvidi Mukulu neakuambuluishe bua uleje tshiakabidi mpala wa mimuemue, ne bua wele tunkunduluila.

²²Nanku badi bakukina nebafue bundu, bantu babi nebajimine.