Read Tshiluba Misambu 102 Bible Online

Misambu 102 - Tshiluba bible

Misambu 102

¹Muena dikenga udi utendelela Mvidi Mukulu, umudidila muadi.

²Maweja-Nangila, teleja mundi nkutendelela, anyisha lubila luanyi.

³Kungedi nyima pandi mu dikenga. Unteleje ne ntema, dituku dindi nkubikila, ungitabe lukasa.

⁴Bualu matuku anyi a panu adi ajimina, bu mudi muinshi wa kapia, mifuba yanyi idi ipia bu nkunyi.

⁵Lungenyi luanyi ndufue, bu mudi tshisosa tshikosa, tshiena nansha mvuluka bua kudia.

⁶Badi bumvua mundi ntua mikemu, ndi mushale mifuba pa mifuba.

⁷Ndi mufuanangane ne kakuekue ka mu tshipela, ndi bu kakutukutu ka mu bibuwa bia nzubu.

⁸Ndi ndala tshitabela, ndi bu nyunyi wa tshiende nkaya pa musonga wa nzubu.

⁹Matuku onsu baluishi banyi badi bampenda, badi banseka, bantatshisha.

¹⁰Ndi ndia butu pa mutu pa kudia biakudia, bintu bionsu bindi nnua bidi bibondakana ne binsonji.

¹¹Bualu udi ne tshiji, udi mufike munda, ke paudi mungambule, mungimanshe kule.

¹²Matuku anyi a panuapa adi bu mudi mundidimbi wa dilolu, ndi mfuba bu tshisosa.

¹³Kadi wewe, Maweja-Nangila, udi mukalenga wa kashidi, udi Mvidi Mukulu wa bikondu bionsu.

¹⁴Wewe neujuke, neufuile Siyone luse, bualu diba dia kumuambuluisha ndimane kukumbana. Eyowa, diba diuvua muambe ndimane kufika.

¹⁵Tuetu bantu bebe tudi banange mabue ende, tudi tumvua luse bua nzubu yende idi mishale bibuwa.[468]

¹⁶Bisamba bionsu bia bantu benyi bitshine Maweja-Nangila, bakalenga bonsu ba pa buloba bujima batshine butumbi buende.

¹⁷Padi Maweja-Nangila wibakulula Siyone, padiye umueneka mu butumbi buende,

¹⁸kena ulengulula bakengi badi bamutendelela, neateleje malomba abu.

¹⁹Bafundile ndelanganyi itshidi kumpala bualu ebu, bua bantu badi Maweja-Nangila mufukulule, bamutumbishe.[469]

²⁰Mu diulu mudiye, Maweja-Nangila mmuinangile, mutangile pa buloba. Ku nzubu wende wa tshijila udi utangila mesu ende panshi,

²¹bua kuteleja muadi wa bena lukanu, ne kusungidila badibu bakosela tshibawu tshia lufu.

²²Nenku, nemmanyishe bena Siyone lumu lua Maweja-Nangila, nebamutumbishe mu Yerushalayime,

²³padisangisha bantu popamue, padisangisha makalenga bua kutendelela Maweja-Nangila.

²⁴Pantshivua mbanga luendu, kutekeshaye bukole buanyi,[470] kukepeshaye matuku anyi a panu.

²⁵Ke pandi ngela lubila ne: “Mvidi Mukulu wanyi, wewe ngudi ne muoyi bidimu ne bidimu, kungangatshi pankatshinkatshi pa matuku anyi a panu.”

²⁶Wakafuka buloba kale, diulu didi mudimu wa bianza biebe.

²⁷Bintu ebi bionsu nebijimine, kadi wewe udi ushala. Diulu ne buloba nebisheleleke bu mudi tshilamba tshisunsuke. Neubishintule bu mudibu bashintula bilamba.

²⁸Kadi wewe kuena ushintuluka, matuku ebe a muoyi kaena ne nshikidilu wawu.[471]

²⁹Bana ba bantu bebe nebase, ndelanganyi yabu neyishindame wewe mumone.