Read Tshiluba Misambu 104 Bible Online

Misambu 104 - Tshiluba bible

Misambu 104

¹Ndi musue kuela Maweja-Nangila tuasakidila! Maweja-Nangila, Mvidi Mukulu wanyi, udi mutambe bunene. Udi muvuale bukenke ne buneme,

²Udi muvuale butoke bu tshinkutu, udi muadije diulu bu ntenta.

³Udi muase nzubu webe wa mulu pa mayi, udi ubanda pa mavuba bu pa ditempu diebe, udi uya ne lupepele bu mapuapua.

⁴Udi utuma mpepele bu batumibue bebe, kapia ke webe muena mudimu.[474]

⁵Udi mushindike buloba pa bitaku biabu, kabuena mua kutenkakana too ne kashidi.

⁶Uvua mububuikile ne mayi bu tshilamba,[475] mayi kubanda ne ku nsongu ya mikuna.

⁷Kadi pauvua muatandishe, wowu kunyema kuyawu lubilu, ku tshiona tshia mukungulu webe.

⁸Kubandawu nsongu ya mikuna, kupueka mu bibandabanda, too ne ku muaba uuvua mualongoluele.

⁹Wewe kuelela mukalu bua kaasambuki, kaapinganyi bua kubuikila buloba.

¹⁰Udi utuma mayi a mpokolu mu misulu, apitshila muinshi mua mikuna.

¹¹Nyama yonsu idi ilua kunua mayi, ne mpunde wa mu tshisuku udi ujikijilaku nyota yende.

¹²Nyunyi idi ne masua ayi pabuipi nawu, idi imba misambu mu dileji dia mabeji.

¹³Udi ulokesha mvula wa muebe mu diulu, udi utabalela buloba bua buikale ne mayi makumbane.[476]

¹⁴Wewe ke udi umeneshila bimuna bisosa, umeneshila bantu biseki bidibu badima. Ke mudi buloba bubapetesha biakudia:

¹⁵ne maluvu a mvinyo bua kubasankisha, ne mafuta bua kukenkesha mpala yabu, ne diampa bua kubapesha bukole.

¹⁶Maweja-Nangila, nansha mitshi idi mipite bunene, idi ne mayi adiyi ikengela, se mmitshi ya sedre ya mu Lebanone, iuvua mukune.

¹⁷Nyunyi idi ibakamu masua ayi, kasonga nyunyi kadi ne diaku disua mu mutshi wa siprese.

¹⁸Mikuna mile nya mbuji ya tshisuku, mabue ke tshisokomenu tshia nyama ya nsenji.[477]

¹⁹Udi muenze ngondu bua kutapulula bidimu, diba didi dimanya tshikondu tshia kubuela.

²⁰Udi utuma miidima, butuku buila, nyama ya muitu yendakana.

²¹Bana ba nyama ba ntambue badi bakeba nyama wa kukuata, badi balomba Mvidi Mukulu tshiakudia tshiayi.

²²Padi diba dipatuka, badi bumbuka, baya kulala mu menayi.

²³Nanku muntu udi upatuka, uya ku mudimu wende, uwenza ne ku dilolu.

²⁴Maweja-Nangila, mudimu webe udi munene! Udi muenze bionsu ne dimanya dia kuenza bintu bia mpatshi! Buloba mbuwule ne bintu biudi mufuke.

²⁵Mona mudi mayi manene malabale, maye muaba mule. Nyama minene ne mikese kayiyi kubadika, idi yendakanamu.

²⁶Mazuwa adi endakanamu, mamba muntu wa mu mayi, Leviyatane, uvua mumufuke bua kunayamu nende.

²⁷Bintu ebi bionsu bidi bitekemena kuudi, bua wewe kubipesha biakudia biabi, mu tshikondu tshiakane.

²⁸Paudi ubipesha bidi biangata, paudi ubulula tshianza tshiebe, bidi bipeta bionsu bidibi bikengela.

²⁹Paudi usokoka mpala webe, bidi bitshina, paudi ubinyenga mueyelu, bidi bifua, bipingana lupuishi kabidi.

³⁰Udi ubipingajila mueyelu, ubifukulula, bionsu bidi bienza bipiabipia pa buloba.

³¹Maweja-Nangila, butumbi buebe bushale kashidi, usanke bua biudi muenze!

³²Paudi utangila buloba, budi buzakala, paudi utua mikuna munu, idi ifuima muinshi.

³³Nenkuimbile misambu matuku onsu antshidi ne muoyi. Mvidi Mukulu wanyi, nenkutumbishe pantshidiku.

³⁴Maweja-Nangila, musambu wanyi ukulengelele, meme ndi ne disanka bua pandi nebe wewe Mvidi Mukulu!

³⁵Benji ba malu mabi bajimine pa buloba, bantu babi kabikadiku nansha! Maweja-Nangila, ndi musue kukuela tuasakidila. Bakutumbishe Maweja-Nangila, Aleluya!