Read Tshiluba Misambu 105 Bible Online

Misambu 105 - Tshiluba bible

Misambu 105

¹Tumbishayi Maweja-Nangila, kobuelayi dina diende, numanyishe bantu bakuabu malu a kukema adiye muenze.

²Numuimbile misambu, numutumbishe nayi, nuambilangane malu ende a kukema onsu.

³Nutue ntunku bua Mvidi Mukulu wa tshijila, nuenu badi bakeba Maweja-Nangila, nusanke.

⁴Tangilayi kudi Maweja-Nangila wa bukole buonsu, kebayi mpala wende matuku onsu.

⁵Nuenu ndelanganyi ya Abrahame, muntu wende, nuenu bana ba Yakobe bantu bende basungula! Nuvuluke malu a kukema adiye muenze, mwuluke bishima biende, ne meyi ende avuaye muambe mukana muende.

⁷Yeye ke Maweja-Nangila, Mvidi Mukulu wetu, meyi adiye wamba adi bua buloba bujima.

⁸Udi uvuluka ndondu wende kashidi, ne diyi divuaye muambe, bua ndelanganyi tshinunu.[478]

⁹Ndondu ewu ke uvuaye mutue ne Abrahame, ke mutshipu uvuaye muditshipe ku mesu kua Izake,[479]

¹⁰kumutekelaye Yakobe bu mukenji, ne Izrayele bu dilaya dia tshiendelele,[480]

¹¹pavuaye umuambila ne: “Ndi nkupesha ditunga dia Kenaane bu bumpianyi buebe ne bua ndelanganyi yebe.[481]”

¹²Bavua bungi bukese, bu mudi benyi bungi bukese mu ditunga.[482]

¹³Bavua baya ku tshisamba ne ku tshisamba tshikuabu, ku bukalenga ne ku bukalenga bukuabu.

¹⁴Kadi Mvidi Mukulu kavua muanyishe, bua muntu nansha umue abenzele bibi, kudimujaye bakalenga bualu buabu ne:

¹⁵“Kanulengi bantu bandi mujidile, kanuenzedi bantu banyi bibi nansha![483]”

¹⁶Kubatuminaye tshiyole mu ditunga, biakudia kukepela.[484]

¹⁷Kadi kutumaye muntu umue, bua kudianjidilaye kumpala kuabu, muntu awu ke Yozefe uvuabu basumbishe ku bupika.[485]

¹⁸Kumusuikabu mionji ku makasa, kumuelabu nkanu mu nshingu,[486]

¹⁹too ne pakakumbana miaku ivua Maweja-Nangila mumuambile, umujadikila muikalaye.[487]

²⁰Mukalenga kutuma diyi bua kumulekelabu mu lukanu, mfumu wa bantu kumulekela.[488]

²¹Kumutekaye ku mutu kua bukalenga buende, ne mfumu wa bintu biende bionsu,[489]

²²bua kulongesha balombodi ba bukalenga, nuwuaye musue,[490] ne bua kupesha bafidi ba ngenyi bakulu lungenyi ne meji.

²³Pashishe Yakobe kuya mu Ejipitu, Izrayele kusomba mu ditunga dia Kame.[491]

²⁴Maweja-Nangila kuvudija bantu bende, kulelabu bana ba bungi, kubapeshaye bukole bupite bua baluishi babu.

²⁵Kukudimunaye meji a bena Ejipitu, kubangabu kukina bantu bende, kukeba mua kubadinga.[492]

²⁶Maweja-Nangila kutuma Moshe, muena mudimu wende, ne Arone uvuaye musungule.[493]

²⁷Ku bukole buende kuenzabu bishima munkatshi muabu, kuenzabu malu a kukema mu ditunga dia Kame.

²⁸Ke Mvidi Mukulu kutumaye miidima, butuku kuila mu ditunga, kakuvua muntu uvua mubenge diyi diende nansha.[494]

²⁹Kuandamunaye mayi a mu misulu yabu, kuvuawu mashi, kushipaye mishipa ivuamu.[495]

³⁰Ditunga diabu kuwula tente ne ndimba, kubuelayi ne mu nzubu ya bakalenga babu.[496]

³¹Mvidi Mukulu utuma diyi, njiji ya lulengu ne tumue kufikabi mu ditunga dijima.[497]

³²Kubatuminaye mvula wa mabue, nkuba kuosha ditunga.

³³Kushidishaye mionji yabu ya mvinyo ne mitshi yabu ya mfiku, kutshibulaye mitshi ivua mu ditunga diabu.[498]

³⁴Mvidi Mukulu utuma diyi dikuabu, mpasu ya mikumbi kufika kayiyi kubala.

³⁵Kudiayi mitshi yonsu ne bisosa bia mu ditunga, kudiayi biakudia bionsu bivua buloba buabu[499] bupatule.

³⁶Ku ndekelu, Mvidi Mukulu kushipa banabute bonsu, ba mu meku a bena Ejipitu, bana ba mbediambedi bavuabu balele, bavuabu balele patshivuabu ne bukole.[500]

³⁷Kupatulaye bantu bende ne biamu bitoke bia mushinga mukole, ne biamu bia mpawungi,[501] kakuvua muntu wa ku bisamba biabu nansha umue uvua ne dikasa dibi.

³⁸Bena Ejipitu kusanka bua dipatuka diabu, bualu bowa bukavua bumane kubakuata.[502]

³⁹Bua kubalama, Maweja-Nangila, kubabadila divuba dia muinshi, ne kapia bua kubatokeshila butuku.[503]

⁴⁰Kubapeshaye nkuadi pakamulombabu, kubukutshishaye ne mampa a mu diulu.[504]

⁴¹Kunzululaye dibue, mayi kupatuka, kupuekawu mu tshipela bu musulu.[505]

⁴²Bualu uvua muvuluke dilaya divuaye mubalaye, divuaye mulaye muntu wende Abrahame.[506]

⁴³Bantu bende bavua ne disanka pavuaye mubapatule, bantu bavuaye musungule, bavua bela mbila ya disanka.

⁴⁴Pashishe kubapeshaye maloba a bisamba bikuabu, kusankabu ne midimu ivua bantu bakuabu benza,[507]

⁴⁵bua kulondabu mikenji yende, ne kulonda malongesha ende. Tumbishayi Maweja-Nangila, Aleluya!