Read Tshiluba Misambu 111 Bible Online

Misambu 111 - Tshiluba bible

Misambu 111

¹Aleluya, Maweja-Nangila ikale ne muoyi! Nensakidile[552] Maweja-Nangila ne muoyi wanji mujima, munkatshi mua bantu bakane badi basangile.

²Malu adi Maweja-Nangila muenze adi manene, bantu badi baamone badi baanyishe.

³Malu ende adiye wenze adi ne lumu ne buneme, buakane buende budi bua kashidi.

⁴Ndi musue bua bantu bavuluke malu ende a kukema. Maweja-Nangila udi ne dinanga, udi ufuila bantu luse,

⁵udi upesha badi bamutshina biakudia, udi uvuluka ndondu wende matuku onsu.

⁶Udi muleje bantu bende bukole buende mu malu adiye wenza, padiye ubapesha ditunga dia bisamba.

⁷Malu adiye wenza ne bianza biende adi aleja bulelela buende ne mudiye ukosa nsambu pa yoyi. Mikenji yende yonsu idi ya kueyemena,

⁸udi muyele bua kashidi. Idi ne bulelela ne buakane.[553]

⁹Uvua mutumine bantu bende lupandu, uvua mumanyishe ndondu wende bua ashale kashidi. Dina diende dia tshijila, didi dikuatshisha bantu bowa.

¹⁰Kutshina kua Maweja-Nangila ntshibangidilu tshia meji. Bantu bonsu badi balonda mikenji,[554] badi bajingulula malu. Butumbi bua Maweja-Nangila mbua tshiendelele.