Read Tshiluba Misambu 132 Bible Online

Misambu 132 - Tshiluba bible

Misambu 132

¹Musambu wa bena ngendu. Maweja-Nangila, vuluka Davide ne lutatu luonsu luvuaye mutate.

²Davide kuditshipa kumpala kua Maweja-Nangila, mulaye Mvidi Mukulu Mukole wa Yakobe ne:

³“Tshiena mbuela mu nzubu muanyi, nansha ndiolola pa bulalu bua kuikishila,

⁴nansha mbuita kuisu, nansha mbungila,

⁵pandi tshiyi mupetele Maweja-Nangila muaba, tshiyi mupetele Mvidi Mukulu Mukole wa Yakobe nzubu!”

⁶Tuetu kumvua bamba ne: mushete wa tshijila udi mu musoku wa Efrata, tudi bausangane mu mpata ya Yayire.[605]

⁷Tubuelayi mu nzubu mua Maweja-Nangila, tuinyike mitu ku makasa ende.[606]

⁸Maweja-Nangila, uye ne mushete wa tshijila, muaba udi butumbi buebe, ufike mu muaba webe wa kuikishila.

⁹Batuangaji bebe bavuale buakane, bu mudibu bavuale bilamba biabu; bantu badi bakuitaba bele mbila ya disanka!

¹⁰Kubengi mukalenga uuvua mulabe manyi,[607] bua dinanga dia muena mudimu webe Davide.

¹¹Maweja-Nangila uvua muditshipe kudi Davide ne mutshipu, udiye kayi mua kulekela ne: “Nensungule umue wa ku bana bebe ba balume, bua kukupinganaye mu bukalenga.

¹²Muanebe wa balume yeye mulame ndondu wanyi ne mikenji indi mumuelele, wende muana kabidi neasombe mu nkuasa wa bamfumu kashidi.[608]”

¹³Bualu Maweja-Nangila uvua musungule Siyone, mujinge bua kuikalaye muaba wende wa kusomba.

¹⁴Kuambaye ne: “Ewu ke muaba wanyi wa kuikishila, ke muaba undi musue kusomba matuku onsu.

¹⁵Eyowa, nengenzele Siyone bimpe, mmupeshe tshiakudia, nempeshe bapele bende biakudia bionsu, bidibu nabi dijinga.

¹⁶Nempeteshe batuangaji lupandu mu Siyone, badi bitaba nebele mbila ya disanka.

¹⁷Nempatuishe mukalenga wa lumu, wa ku ndelanganyi ya Davide mu Siyone. Nentekemu mukalenga undi mulabe manyi,[609] bu mudibu bateka muendu mutemesha.

¹⁸Nemfuishe baluishi bende bundu, tshifulu tshia bukalenga netshikenke ku mutu kuende.”