Read Tshiluba Misambu 140 Bible Online

Misambu 140 - Tshiluba bible

Misambu 140

¹Musambu wa mulombodi wa bena misambu. Mu mukanda wa misambu ya Davide.

²Maweja-Nangila, unsungidile kudi bantu babi, umpandishe kudi bena tshikisu.

³Meji abu adi a kuenzelangana bibi, badi bakeba ndukilu[637] dituku dionsu.

⁴Badi batuishe ludimi luabu bu mudi nyoka, lulengu lua nyoka wa ntoka[638] ludi ku mishiku yabu.

⁵Maweja-Nangila, undame bua tshiponyi mu bianza bia bantu babi; umpandishe kudi bena tshikisu, badi belangana meji a kunteya mukolu.

⁶Bena ditambisha badi banteya, badi bangela masoka ne makondu, bantekela mateyi mu njila bua kunkuata.

⁷Kadi meme kuambila Maweja-Nangila ne: “Wewe udi Mvidi Mukulu wanyi. Maweja-Nangila unteleje pandi nkutendakena.

⁸Maweja-Nangila Mvidi Mukulu, wewe ke bukole buanyi budi bundama, wewe ke udi ulama mutu wanyi diba dia mvita.

⁹Maweja-Nangila, kuanyishi majinga a bantu babi, kulekedi majinga abu akumbane.” Bantu badi banduisha badi ne ditambisha dia bungi;[639] bavua banjingila diakabi, diakabi edi dibapingene bobu meme!

¹¹Makala a kapia abaponene pambidi. Mvidi Mukulu abashidishe mu kapia, kabamonyi mua kupatukamu!

¹²Muntu udi utumpilangana malu kashadi ne muoyi mu ditunga. Diakabi dilonde muntu wa tshikisu, kadimulekedi.[640]

¹³Maweja-Nangila, ndi mumanye ne: udi ubingisha bapele, udi ulumbuluila bena dikenga.

¹⁴Eyowa, bakane nebakutumbishe wewe Maweja-Nangila, bantu ba malu mimpe nebashale ne muoyi ku mesu ebe.