Read Tshiluba Misambu 141 Bible Online

Misambu 141 - Tshiluba bible

Misambu 141

¹Musambu wa mu mukanda wa misambu ya Davide. Maweja-Nangila, ndi nkubikila, fika lukasa ungambuluishe, umvua lubila lundi nkuela.

²Dilomba dianyi dibande kuudi, bu muinshi wa kamonya, dilomba dianyi[641] dikale bu mulambu wa dilolu.

³Maweja-Nangila, lama mukana muanyi, kuba mishiku yanyi.

⁴Unkandike bua tshiyi kuamba miaku mibi, nansha kuenza bualu bubi, tshiyi kuidikija bantu badi benzela bakuabu bibi. Undame tshiyi kudia nansha tshiakudia tshidibu banange.

⁵Ndi nganyisha muntu wa malu mimpe antute, muntu muakane andengeje; tshiena mua kubenga, ndi munange. Kadi padi bantu babi benza malu mabi, tshiena ndekela bua kukutendelela.[642]

⁶Mvua muambe ne: bena lukuna banyi nebumvue bualu ebu, patutabu bandumbulula babu ku lubuebue.

⁷Bu mudi mutanta upandika mu buloba, kandondu ka bafue nekunzulule mukana muaku, bua kubakula mifuba yabu ikale mitangalake.[643]

⁸Maweja-Nangila, Mvidi Mukulu wanyi, mesu anyi mmatangile kuudi, ndi nyemena kuudi, ulame muoyi wanyi.

⁹Umpandishe ku mateyi adibu banteya, kudi bantu aba benji ba bibi.

¹⁰Bantu ba tshikisu aba bapone mu buteyi buabu, meme mpande!