Read Tshiluba Misambu 142 Bible Online

Misambu 142 - Tshiluba bible

Misambu 142

¹Kasala ka mu mukanda wa misambu ya Davide, muimbe pavuaye utendelela musokome mu lubuebue[644].

²Ndi ngela mbila kudi Maweja-Nangila, ndi ntendakena Maweja-Nangila ne mbila mikole.

³Ndi mmukuatshila tshilumbu, mmuleja dikenga dianyi.

⁴Pandi nteketa mu maboku, wewe udi mumanye kundi nya. Bantu mbateya mu njila undi nyila.

⁵Tangila ku nseke yanyi, umone: kakuena muntu udi undama, tshitshiena kabidi ne muaba wa kusokomena, kakuena muntu udi utangila buanyi bualu.

⁶Ndi ngela lubila kuudi wewe, Maweja-Nangila, ngamba ne: wewe ke tshisokomenu tshianyi, ke tshianyi tshintu tshindi natshi, mu buloba ebu butudi basombe.

⁷Teleja muadi wanyi, bualu ndi mushikile. Umpandishe kudi bantu badi bankengesha, mbampite bukole.

⁸Umpatule mu lukanu, mmone mua kukutumbisha pamue ne bakuitabi bebe, pawikala mungenzele bimpe.