Read Tshiluba Misambu 18 Bible Online

Misambu 18 - Tshiluba bible

Misambu 18

¹Musambu wa mu mukanda wa misambu ya Davide, wa mu mukanda wa mulombodi wa bena misambu. Davide muntu wa Mvidi Mukulu uvua wambila Maweja-Nangila miaku eyi pavuaye mumane kumupatula mu bianza bia baluishi bende, nangananga bia Shawule.

²Maweja-Nangila, ndi mukunange, Wewe udi bukole buanyi.

³Maweja-Nangila udi lubuebue luanyi, muaba undi nsokomena, mpetela lupandu. Udi undama bu ngabu. Udi mukuna undi nyemena bua kupanda.

⁴Maweja-Nangila atumbe! Pandi mmubikila, diakamue udi unsungidila kudi baluishi banyi.

⁵Njiwu ya lufu ivua minjingile,[64] ikeba kumpuekesha bu mavuala a mayi.

⁶Kandondu ka bafue kavua kasue kuya nanyi, buteyi buaku bukeba kumbakula.

⁷Dikenga kumpita, meme kubikila Maweja-Nangila, mmuela mbila bua angambuluishe. Maweja-Nangila mu nzubu kumvua diyi dianyi, muadi wanyi kufika kudiye.

⁸Ke buloba kuzakala, kunyungakana, bitaku bia mikuna kutenkakana, kunyukakana, bualu bua tshiji tshia Maweja-Nangila.

⁹Muinshi kupatuka mu diulu diende, kapia ka tshinyangu mukana muende, kela tuntolentole, kosha.

¹⁰Maweja-Nangila kunzulula diulu, kupueka pa mavuba mafiike,

¹¹musombe pa Kerubine, nyama wa mapuapua, upapala pa nsala ya lupepele.

¹²Kudibuikilaye ne midima mikole, mavuba makuatakane ne mayi kumujingila.

¹³Mabue a mvula ne makala a kapia,[65] avua apatuka bu butoke buvua kumpala kuende, apanda mavuba makuatakane.

¹⁴Maweja-Nangila kudidisha makubakuba mu diulu. Mvidi Mukulu Muena kulu kuela diyi.[66]

¹⁵Kuasaye miketa, utangalaja baluishi banyi,[67] kupenyaye bu muela wa mvula, ubapapula.

¹⁶Muinshi mua mayi kumueneka, bitaku bia buloba kupatuka, pavua Maweja-Nangila ukanyina baluishi bende, ubaleja tshiji tshivuaye natshi.[68]

¹⁷Mu diulu nuwuaye, kuololaye tshianza bua kunkuata, kumpatula mu njiwu mumvua mudine ne kasuki.

¹⁸Kumpandishaye mu bianza bia baluishi banyi ba bukole, bia bena lukuna bavua bampita makanda.

¹⁹Bavua banduisha pamvua mu dikenga, kadi Maweja-Nangila kunkolesha.

²⁰Maweja-Nangila kumpatula mu njiwu. Bu mudiye munnange, kunsungidilaye.

²¹Maweja-Nangila mmungenzele bimpe, bualu tshivua muenze bibi. Mmunsankishe, bualu ku muela wanyi kakuvua mashi.

²²Ndi nkumbaja mikenji ya Maweja-Nangila. Tshiena mutombokele Mvidi Mukulu wanyi.

²³Ndi ndonda njila udiye undeja, tshiyi mbenga tshidiye mufunde.

²⁴Ndi musue bionsu bivuaye mujinge, ndi mudilame ku bubi.

²⁵Maweja-Nangila mmunsankishe, bualu ndi mumutumikile. Udi mumanye mumvua muenze amu bidiye musue.

²⁶Maweja-Nangila, wewe udi unanga badi bakunanga,[69] usankisha bikole, badi bakutumikila.

²⁷Badi ne muoyi mutoke, udi ubaleja muoyi muimpe, ubenga ba muoyi mubi.

²⁸Udi usungidila badi badipuekesha, upetula badi baditambisha.

²⁹Maweja-Nangila udi untokeshila njila, umusha miidima muaba undi ngenda.

³⁰Patudi nebe ndi mbanda bimana,[70] ntupika, ndiela kudi baluishi, mbatshimuna.

³¹Bidi Mvidi Mukulu wenza bidi biakane.[71] Yeye muambe diyi, udi udikumbaja. Udi ulama bu ngabu bonsu badi banyemena kudiye.

³²Kakuena Mvidi Mukulu mukuabu, amu Maweja-Nangila. Amu Mvidi Mukulu wetu udi mukole, mupite lubuebue.

³³Udi undongoluela njila, umpesha bukole bua kuluangana.[72]

³⁴Udi unnyemesha lubilu bu lua ngulungu, ungimanyika pa miongu ya mikuna.[73]

³⁵Udi undongesha mvita, undeja mundi mua kunana buta.

³⁶Maweja-Nangila, udi undama ne diebe dia bukole, unsungidila ne ngabu, umpesha bukole,[74] pandi nkubikila.

³⁷Udi mungakajile njila. Ke pandi nnyema, tshiyi nansha ntetuka.

³⁸Ndi ndondakaja bena lukuna banyi, mbakuata, mpingana mumane kubabutula.

³⁹Ndi mbatapa, mbasunsula, kabayi mua kujuka, nteka dikasa pambidi pabu.[75]

⁴⁰Wewe udi umpesha bukole bua kuluangana, utekesha baluishi banyi, batue binu ku makasa anyi.

⁴¹Udi unyemesha baluishi banyi.[76] Ndi mbutula badi nanyi lukuna.

⁴²Nansha bela mbila, muntu kena ubambuluisha. Nansha batendelela Maweja-Nangila, kena ubitaba.

⁴³Ndi mbavingutula, mbenza lupuishi, ludi mvunde upepula, mbadiata bu bitotshi bia mu njila.[77]

⁴⁴Udi mumpandishe mu bianza bia bantu batomboke,[78] munteke mukalenga wa bisamba. Bantu bamvua tshiyi mumanye, bakadi bantumikila.

⁴⁵Badi bumvua amu muaku wanyi, bitaba. Bantu benyi badi balabidila kundi.[79]

⁴⁶Kabena bantuila nkanana. Badi bapatuka miaba ivuabu basokome, bazakala.

⁴⁷Maweja-Nangila atumbe! Tuasakidila lubuebue luanyi! Tumbishayi Mvidi Mukulu, uvua mumpandishe.

⁴⁸Amu ku bukole buende, ndi ntshimuna baluishi, bitaba bumfumu buanyi.

⁴⁹Maweja-Nangila, udi unsungidila kudi bena lukuna banyi. Ndi ntshimuna badi banduisha, mpatuka mu bianza bia bena tshinyangu.

⁵⁰Ke pandi nkutumbisha mu bukua bisamba, nkuimbila misambu, nkusamuna.[80]

⁵¹Maweja-Nangila mmuambuluishe bikole mukalenga, uvuaye musungule, mmunange kashidi Davide uvuaye mujidile,[81] kabidi ne ndelanganyi yende yonsu.