Read Tshiluba Misambu 22 Bible Online

Misambu 22 - Tshiluba bible

Misambu 22

¹Musambu wa mu mukanda wa misambu ya Davide, wa mu mukanda wa mulombodi wa bena misambu, wa kuimba ne muadi bu wa “Ngulungu wa tshienda patshiatshia.”

²Mvidi Mukulu wanyi, Mvidi Mukulu wanyi, wandekedi bua tshinyi?[86] Meme kudila kukunza mesu, wewe nansha kunteleja! Udi ushala kule bua tshinyi?

³Mvidi Mukulu wanyi, butuku ne munya, ndi nkubikila, kadi tshiena mpeta dikisha, bualu kuena ungambuluisha!

⁴Kadi wewe ke udi Mvidi Mukulu wa tshijila, udi musombe mu nkuasa wa bumfumu! Bena Izrayele badi bakutumbisha matuku onsu!

⁵Bankambua betu bavua batekemena kuudi, wewe kubasungidila.

⁶Bavua bakubikila, wewe kubapikula. Bavua bakutekemena, kabayi bashala ku bundu!

⁷Kadi meme tshitshiena muntu! Badi bammona bu musanda. Bonsu badi bampenda, bampepeja!

⁸Badi bammona, banseka, babeteka ku mishiku, bakupa mitu,[87] bamba ne:

⁹“Tekemena Maweja-Nangila, neakuambuluishe! Neakupikule,[88] bualu udi wende wa pa muoyi!”

¹⁰Maweja-Nangila, wewe uvua mumpatule munda mua mamu bimpe! Uvua munteke pa tshiadi tshiende, tshiyi ntshina tshintu!

¹¹Amu bandela, wewe kushala ndeji wanyi! Amu mmona diba, wewe ukavua Mvidi Mukulu wanyi!

¹²Kushadi kule, bualu ndi mu dikenga! Kakuena udi mua kungambuluisha, amu wewe!

¹³Baluishi bavule mbanjingile, bangela munkatshi, bu ngombe milume ya lonji ya mu mpata ya Bashane!

¹⁴Idi ibutula mukana, ikeba kundia, idila bu nyama ya ntambue ya tshikisu!

¹⁵Bukole buanyi budi bupueka, bu mudi mayi atangalaka. Mifuba idi itukakana, muoyi wanyi wenguluka munda bu manyi.

¹⁶Muminu mmungume,[89] ludimi lulamate mu tshilakalaka. Wewe kunshiya mu lupuishi bu tshitalu!

¹⁷Tshisumbu tshia benji ba bibi mbangele munkatshi. Mbua eyi imfinakaja, ikeba kunsuma ku bianza ne ku makasa![90]

¹⁸Tshinyanu ntshinkuate. Mifuba yanyi yonsu idi imueneka patoke! Baluishi banyi badi bimana, banjooja banseka.

¹⁹Badi babanyangana bilamba bianyi,[91] batshinka udi mua kubiangata.

²⁰Kadi Maweja-Nangila, kushadi kule! Wewe ke bukole buanyi, luakunu lukasa, ungambuluishe!

²¹Umpandishe ku lufu lua tshinyangu, undame bua mbua eyi kayinsumi!

²²Umpandisheku mukana mua ntambue, undame bua nsengu ya mbowa kayintapi! Eyowa, wewe kungambuluisha!

²³Nanku nemmanyishe bana betu biuvua muenze! Nenkutumbishe, bantu bateleja[92]:

²⁴“Tumbishayi Maweja-Nangila, nuenu bantu bende! Munemekayi, nuenu ndelanganyi ya Yakobe! Mutshinayi, nuenu bena Izrayele!

²⁵Bualu kavua mupepeje nansha mupetule bapela, kavua mubele nyima! Kadi uvua muteleje lubila luabu!”

²⁶Maweja-Nangila, ke pandi nkutumbisha mu tshisangilu tshinene, nkulambula milambu imvua mukulaye, bantu bebe batangile!

²⁷Ndi mbikila bapela, badie buukute![93] Bantu badi batendelela Mvidi Mukulu, nebamutumbishe, balale panu, baboboke!

²⁸Bantu ba mu bisamba bionsu bia pa buloba, bavuluke Maweja-Nangila, bapingane kudiye! Matunga onsu amukukuile, adiele panshi kumpala kuende.

²⁹Bualu Maweja-Nangila udi mukalenga wa bantu, udi ku mutu kua bukua bisamba!

³⁰Banene ba pa buloba nebamukukuile! — Bonsu bavuavua kufua,[94] badi bamutuila binu!

³¹Ndelanganyi yabu neyimuenzele mudimu. Baledi nebamanyishe bana mudi Maweja-Nangila!

³²Ndelanganyi yonsu neilondelangane ne: “Maweja-Nangila mmuenze bia dikema, mmupandishe bantu bende.”