Read Tshiluba Misambu 25 Bible Online

Misambu 25 - Tshiluba bible

Misambu 25

¹Musambu wa mu mukanda wa misambu ya Davide. Maweja-Nangila, ndi nsemena kuudi.[102]

²Mvidi Mukulu wanyi, ndi ndifila kuudi. Kumfuishi bundu, bena lukuna banyi kabanseki!

³Badi batekemena kuudi, kabakunyingalala. Bundu mbua badi bakubenga! Nebashale bianza bitupu!

⁴Maweja-Nangila, undeje njila wa kulonda, undongeshe mua kusomba panu.

⁵Undongeshe, undudike bua nkulamate. Wewe ke Mvidi Mukulu udi umpandisha. Matuku onsu ndi ntekemena kuudi.

⁶Maweja-Nangila, vuluka ne: wewe udi Mvidi Mukulu wetu, kuonsu kuaka uvua utunanga, utufuila luse.

⁷Nanku, kuvuluki bilema bianyi bia ku buana, nansha ntupakanyi yanyi. Kadi Maweja-Nangila, kumpu muoyi, bualu udi munnange. Ndi ntekemena luse luebe.

⁸Maweja-Nangila mmuena bulenga ne buakane, udi uleja bena tshibawu njila wa kulonda.

⁹Udi ulombola bapuekele mu njila wa buakane, ubalongesha tshidiye musue.

¹⁰Bionsu bidi Maweja-Nangila wenza, bidi bileja mudiye unanga bantu badi balama ndondu wende, bakumbaja mikenji yende.

¹¹Maweja-Nangila, wewe udi Mvidi Mukulu. Mibi yanyi mmipite bungi! Umfuile luse!

¹²Maweja-Nangila nealeje muntu udi umunemeka, njila udiye ne bua kusungula.

¹³Muntu awu neikale muena diakalenga. Bana bende nebapiane buloba.[103]

¹⁴Badi bitaba Maweja-Nangila, udi ubamanyisha malu ende masokome, ubalongesha mudi ndondu wende.

¹⁵Mesu anyi adi diba dionsu kudi Maweja-Nangila, bualu amu yeye neankopole mu buteyi.

¹⁶Maweja-Nangila, untangile, umfuile luse. Ndi mu dikenga, tshiyi ne udi ungambuluisha.

¹⁷Umushe kanyinganyinga mu muoyi wanyi, umpatule mu dikenga.

¹⁸Mona mundi nkenga, ntata bikole. Umfuile luse bua bilema bianyi bionsu.

¹⁹Umanye ne: bena lukuna banyi mbapite bungi. Badi nanyi lukinu lukole.

²⁰Undame, unsungidile. Kumfuishi bundu, bualu ndi nkutekemena.

²¹Ungambuluishe, bua nkumbaje tshiudi musue, tshiyi ngenzela bantu bibi.

²²Eyi, Mvidi Mukulu, pikula Izrayele, umupandishe ku makenga ende onsu.