Read Tshiluba Misambu 38 Bible Online

Misambu 38 - Tshiluba bible

Misambu 38

¹Musambu wa mu mukanda wa misambu ya Davide, bua kuleja Mvidi Mukulu dikenga diende[157].

²Maweja-Nangila, kuena mua kumpisha, nansha wewe ne tshiji, kuena mua kunnyoka,[158] nansha wewe mumfikile munda.

³Udi mungase mikete yebe, muntuute, munkulule panshi.

⁴Mubidi mmuntukakane onsu mujima, bualu udi munnyoke ne tshiji. Mifuba yanyi mmikoyoboke, bualu mvua muenze bibi.

⁵Bilema bianyi mbipite tshipimu, bingenza bujitu budi bumpita dikanda.

⁶Mputa yanyi idi mibole, inunka bibi, bualu mvua muenze malu a butatakane.

⁷Maboku mmantekete. Dikenga ndintonde. Butuku ne munya ndi amu ne binsonji kuisu.

⁸Munda munjukuke luya. Mubidi mmuntukakane onsu mujima.

⁹Bukole buonsu mbujimine, ngenda mukobame. Muoyi udi undubakana munda.

¹⁰Maweja-Nangila, wewe udi mumanye tshindi njinga, mumvue kabidi mikemu yanyi.

¹¹Muoyi udi ungomba munda. Bukole mbunjimine. Mesu anyi akadi bibuidibuidi.

¹²Pandi nkengakana nanku, balunda banyi ne bena mutumba badi bannyema, nansha bana betu bakadi batalamukile pa bule.

¹³Badi bankebela lufu, badi banteya mateyi. Badi banjingila diakabi, badi bangelela tshifufu tshibi, basombela amu bua kunjana.

¹⁴Kadi meme ndi njibika matshi, tshiyi nteleja. Ndi ngenza bu kamama, tshiyi ngamba bualu.

¹⁵Ndi ngenza bu muntu udi kayi umvua, ke pandi tshiyi ngandamuna.

¹⁶Maweja-Nangila, ndi mutekemene kuudi, Maweja-Nangila, Mvidi Mukulu wanyi, wewe nkayebe neubandamune.

¹⁷Nkavua mukulombe ne: ubakandike, kabasanki pandi mu dikenga, kabaditembi pandi ntupakana.

¹⁸Ndi ngamba kufua tshipuka. Dikenga kadiena dinshila muaba.

¹⁹Eyowa, ndi ntonda bubi buanyi, bualu budi bungenza bowa.

²⁰Baluishi banyi batshidi ne bukole, batshidi ne dikanda. Badi bankina kapayi bualu mbapite bungi.

²¹Badi bampingajila bibi pa bilenga bimvua mubenzele. Badi bantandisha, bualu ndi musue kuenza bimpe.

²²Maweja-Nangila, kundekedi, Mvidi Mukulu wanyi, lua kundi.

²³Maweja-Nangila mumpandishi wanyi, kolesha, ungambuluishe.