Read Tshiluba Misambu 39 Bible Online

Misambu 39 - Tshiluba bible

Misambu 39

¹Musambu wa mu mukanda wa mulombodi wa bena misambu ne wa mu mukanda wa Yedutune.[159] Wa mu mukanda wa misambu ya Davide.

²Mvua muambe ne: “Nendikandile bua kuakula bibi, tshiena mua kuamba bualu budi mua kumpisha. Pandi munkatshi mua bantu babi, nempuwe bu muntu musuike tshilamba ku mishiku.”

³Nanku meme kushala bu kamama, tshiyi ngakula, meme kubenga kuamba bualu.[160] Kadi dikenga dianyi kukola amu kukola.

⁴Muoyi wanyi unduluka munda, meji amvua ngela avua angosha. Ke meme kuakula[161] ne:

⁵Maweja-Nangila, nemfue diba kaayi? Nenshale kabidi ne muoyi matuku bungi munyi? Ungandamune bua mmanye matuku autshidi muntapile.

⁶Matuku anyi a panu adi anu bu ntanta ya tshianza. Bidimu bianyi bidi amu tshianana ku mesu ebe. Muntu nansha yeye ne muoyi, udi amu bu lupepele.

⁷Muntu udi utua eku, utua kuaka: bidi amu bu tshilota. Udi uditatshisha, kayi upeta tshintu. Kadi nansha yeye mupete biuma, kena mumanye wabiangata.

⁸Maweja-Nangila, tshindi mua kutekemena kabidi ntshinyi? Amu wewe ke udi mua kungenzela bionsu.

⁹Unsungidile ku bubi buanyi buonsu,[162] kabanseki kudi bidingidingi.

¹⁰Ndi mpuwa, tshiyi mbulula mukana. Bualu wewe ke udi muenze bionsu ebi.[163]

¹¹Ukadi muntuute, mbikumbane. Mituutu yebe idi mipite.

¹²Paudi unyoka muntu bua bilema biende, udi umulengeja. Kadi udi umusha bionsu bidi muntu unanga, bu mudi tshishi tshidia tshimuma. Bushuwa, muntu udi amu bu lupepele.

¹³Maweja-Nangila, teleja mundi nkutendelela, teya matshi ku lubila luanyi. Pandi ndila muadi, ungambuluishe. Bu muvua bankambua banyi bonsu, ndi amu muenyi kumpala kuebe, tshiyi ne diyi dia kuamba.

¹⁴Kadi undekele, mpete dikisha, bua mmone mua kutua mimuemue, bangabanga ne meme kushiya panuapa, kujimina kashidi.