Read Tshiluba Misambu 45 Bible Online

Misambu 45 - Tshiluba bible

Misambu 45

¹Musambu wa mu mukanda wa mulombodi wa bena misambu. Muimba ne nzenze. Kasala ka mu mukanda wa misambu wa bena Kora. Musambu wa dinanga[183].

²Muoyi wanyi udi muwule ne miaku milenga, pandi nsaka musambu ewu bua mukalenga. Ludimi luanyi ludi luwimba bilenga, amu bu mudi mufundi wa dilambu ukeba kufunda bimpe ne kasala kende.

³Bulenga bua mpala webe mbupite bua bantu bakuabu. Mishiku yebe idi yakula amu miaku ya meji. Mvidi Mukulu mmukuele lupemba kashidi.

⁴Tshilobu, suika mukaba, upayike muela. Ke bidi bileja butumbi ne lumu biebe.

⁵Nana buta, enda diakalenga,[184] banda pa kabalu, uye ku mvita. Uluangane bua buakane, usungidile bapele. Bu muudi ne dikanda, neutshimune baluishi.

⁶Miketa yebe idi mitue mitambe.[185] Neibuele mu mioyi ya baluishi bebe. Bantu nebashinde ku makasa ebe.

⁷Nkuasa webe udi mushindama kashidi, amu bu mudi nkuasa wa Mvidi Mukulu.[186] Udi ulombola bukalenga buebe ne buakane.

⁸Udi munange buakane, mubenge bubi. Ke padi Mvidi Mukulu, Mvidi Mukulu webe,[187] mukujidile, mukuele manyi a tshijila pa mutu, mukusungule amu wewe, mubenge bena mulongu nebe.

⁹Bilamba biebe bidi binunka dipembu dia manananshi mashilangane. Mu nzubu muebe mulengeja ne mibanga mudi miadi ya bisanji idi ikusankisha.

¹⁰Bana ba bakaji ba bamfumu badi bannyungulukila. Ku diebe dia balume[188] kudi mukalenga mukaji, muvuale bilengejilu bia mpawungi muimpe.

¹¹Muananyi wa bakaji, teleja, uvuluke bimpe mundi ngamba: Vulamina ditunga dienu ne bana benu.

¹²Mukalenga udi ukujinga bua mpala webe. Yeye ke mfumu webe mpindiewu, umutumikile!

¹³Bena ku Tire nebakutuadile milambu. Baneme ba matunga nebakuvuile bua kupeta diakalenga.

¹⁴Muana wa bakaji wa mukalenga udi ubuela mu nzubu, mulenga mulaya, muvuale bilamba bia mushinga mukole, bilengeja ne mpawungi.[189]

¹⁵Bamane kumuvuadika bilamba bia malenda, bia mekalamekala. Badi bamufila kudi mukalenga. Bansongakaji badi bamushindikija bua kumubanjija.[190]

¹⁶Badi babuela mu nzubu wa mukalenga. Bantu badi bela tunkunduluila, basanka.

¹⁷Mukalenga wanyi, bana bebe ba balume nebapiane bumfumu bua bankambua bebe. Neubateke bamfumu pa buloba bujima.

¹⁸Musambu wanyi neuvuluije bantu lumu luebe, mu ndelanganyi ne ndelanganyi. Bantu bonsu nebakutumbishe kashidi tshiendelele!