Read Tshiluba Misambu 46 Bible Online

Misambu 46 - Tshiluba bible

Misambu 46

¹Musambu wa mu mukanda wa mulombodi wa bena misambu ne wa mu mukanda wa misambu wa bena Kora[191] wa kuimba ne meyi matue.

²Mvidi Mukulu udi tshisokomenu tshietu, utupe bukole. Mu makenga etu udi utuambuluisha misangu yonsu.

³Nanku katuena tutshina, nansha buloba buzakala, nansha mikuna miupukila mu mayi manene,

⁴nansha mavuala akungula, asaba, adiela mulu, anyungisha mikuna.

⁵Musulu udi upitshila mu tshimenga tshia Mvidi Mukulu, ufila mayi matalale, usankisha bantu. Mu tshimenga atshi ke mudi nzubu wa tshijila wa Mvidi Mukulu, Muena kulu.

⁶Mvidi Mukulu udi mu tshimenga etshi. Nanku kabena mua kutshibutula. Butuku kabuyi buanji kutshia, ukadi uvua kutshiambuluisha.

⁷Padi Mvidi Mukulu wakula, bisamba bidi bizakala, makalenga atutakana, buloba bunyungakana.

⁸Maweja-Nangila wa bukole buonsu udi netu. Mvidi Mukulu wa Yakobe udi utulama.

⁹Kanumonayi bidi Maweja-Nangila muenze. Tangilayi malu a dikema adiye mukumbaje pa buloba.

¹⁰Udi ujikija mvita pa buloba bujima, utshibula buta, ukosa difuma, osha ngabu mu kapia.[192]

¹¹Udi wamba ne: “Lekelayi mvita! Numanye ne: Meme ke Mvidi Mukulu: Ndi ku mutu kua bisamba ne kua buloba bujima!”

¹²Maweja-Nangila wa bukole buonsu udi netu. Mvidi Mukulu wa Yakobe udi utulama.