Read Tshiluba Misambu 48 Bible Online

Misambu 48 - Tshiluba bible

Misambu 48

¹Musambu wa mu mukanda wa misambu wa bena Kora[196].

²Maweja-Nangila udi munene. Mbimpe tutumbishe Mvidi Mukulu wetu mu tshimenga tshiende, pa mukuna wende wa tshijila.[197]

³Siyone, mukuna wa Mvidi Mukulu, udi muimpe mutumbuke! Tshimenga tshia Mukalenga munene,[198] tshidi tshisankisha buloba bujima.

⁴Nansha bantu bakolesha tshimenga etshi ne bimana, amu Mvidi Mukulu ke udi utshilama.

⁵Bakalenga bavua badisangishe, baya kuluisha mukuna wa Siyone.

⁶Bamona amu mukuna, kupapukabu! Bowa kubakuata, kunyemabu.

⁷Luzakalu kubenza, bu mudi dikenga dikuata mukaji pa kulela,

⁸bu mudi lupepele lua kudi diba dibanda, lutshibula majuwa manene adi aya ku Tarshishe.

⁹Tuvua bumvue bivua Mvidi Mukulu muenze kale. Lelu tuvua babimone mu tshimenga tshia Maweja-Nangila wa bukole buonsu. Amu Mvidi Mukulu ke udi utshishindika kashidi.

¹⁰Mvidi Mukulu wetu, mu nzubu webe wa tshijila, tudi tuvuluka muuvua mutunange, mutuenzele bimpe.

¹¹Miaba yonsu bantu badi bakutumbisha. Lumu luebe ndutangalake pa buloba bujima, bualu udi ulombola bantu ne buakane.

¹²Pa mukuna wa Siyone bantu basanke! Mu bimenga bia Yuda batue tshianga!

¹³Nyungulukayi mukuna wa Siyone! Nubale tuleya tua mu tshimenga!

¹⁴Nukatshile mudi bimana biatshi! Numone muvuabu bakoleshe imue nzubu![199] Nanku, nenumone mua kumanyisha ndelanganyi yalonda ne:

¹⁵Mvidi Mukulu ewu ke Mvidi Mukulu wetu wa kashidi! Neatulombole kashidi tshiendelele![200]