Read Tshiluba Misambu 5 Bible Online

Misambu 5 - Tshiluba bible

Misambu 5

¹Musambu wa mu mukanda wa mulombodi wa misambu, wa kuimba ne nshiba. Musambu wa mu mukanda wa misambu ya Davide.

²Maweja-Nangila, umvua bindi ngamba, teleja mikemu yanyi!

³Mukalenga wanyi, Mvidi Mukulu wanyi, teleja ne ntema pandi nkubikila. Wewe ke undi ndomba.

⁴Maweja-Nangila, dinda dionsu ndi nkuela lubila. Patshiatshia ndi mfika kuudi, nshala muindile diandamuna diebe.

⁵Mvidi Mukulu, wewe kuena wanyisha buenzayi. Muntu mubi kena mua kufika kuudi.

⁶Kuena musue kumona bena kapeja. Udi ukina bonsu badi benzela bakuabu bibi.

⁷Wewe udi ubutula bena dishima, ubenga badi bashipa bantu, nansha badi babadinga.

⁸Kadi bu muudi munnange bikole, ndi mua kubuela mu nzubu muebe, kukukukuila mu muaba webe wa tshijila.[13]

⁹Maweja-Nangila, undudike bua nkumbaje tshiudi musue. Bualu baluishi badi bankengesha. Undeje njila uudi mundongoluele.

¹⁰Katuena mua kuitaba bidi baluishi banyi bamba. Badi bela meji amu bua kubutula bantu. Miaku yabu idi itukebela lufu. Badi bakula bua kudinga bantu.[14]

¹¹Mvidi Mukulu wanyi, ubanyoke, mbena tshibawu. Mateyi avuabu batuteya, abakuate bafue. Ubipate muaba uudi, bualu bubi buabu mbupite. Badi anu bakutombokela.

¹²Bonsu badi basokome kuudi, basanke, batue tshianga kashidi, bualu wewe udi ubalama. Bonsu badi bakunanga, bimbe basanguluke!

¹³Maweja-Nangila, badi bakulamata, udi ubela lupemba. Bu muudi ubananga, udi ubajika ku ngabu.