Read Tshiluba Misambu 51 Bible Online

Misambu 51 - Tshiluba bible

Misambu 51

¹Musambu wa mu mukanda wa mulombodi wa bena misambu ne wa mu mukanda wa misambu ya Davide.

²Musambu ewu mmusake tshikondu tshivua muambi Natane mumonangane ne Davide, yeye mumane kubuelela Batsheba[211] mu nzubu.

³Mvidi Mukulu wanyi, umfuile luse, ukupule bubi buanyi, bualu udi mulenga mutambe, kabidi ne muoyi mupite buimpe.

⁴Ungumushe bubi buonsu, untokeshe ku tshilema tshianyi.

⁵Ndi mumanye mundi mukutombokele. Ndi muvuluke bubi buanyi diba dionsu.

⁶Ndi mukuenzele bibi amu wewe nkayebe, bualu ndi muenze biudi ubenga. Paudi umpisha, udi wenza amu pa bualu. Tshiena mua kuela mpata mushindu uudi undumbuluisha.[212]

⁷Eyowa, ndi muenji wa malu mabi, katshia bandela, muena tshibawu, katshia bangimita.

⁸Kadi wewe udi musue amu bua muntu ambe malu malelela kayi usokoka bualu. Undongeshe,[213] bua kondu kanyi ka munda kikale katuuta pa bualu.

⁹Ukupule bubi buanyi, ungoweshe,[214] ntoke zezeze. Nanku tshiakuikala kabidi muena tshibawu.

¹⁰Ungambile muudi mumfuile luse, bua ngende kabidi ne musangelu. Nansha wewe mumane kunzaza, nensanguluke.

¹¹Kutangidi bilema bianyi, kupula bubi buanyi buonsu.

¹²Mvidi Mukulu wanyi, fila muoyi mutoke munda muanyi. Umpeshe lungenyi lupialupia, ulushindike.

¹³Kungipatshi pabuipi nebe. Kumpadi Mueyelu webe wa tshijila.

¹⁴Nsanke tshiakabidi, bualu udi mumpandishe. Umpe muoyi wa kukutumikila.

¹⁵Badi bakutombokela, nembalongeshe mudibu mua kukulengelela, bua badilengeje, bitabe ku diyi diebe.

¹⁶Mvidi Mukulu wanyi, Mupandishi wanyi, ungepule ku lufu.[215] Nemmanyishe bantu ne disanka muudi munsungidile.

¹⁷Maweja-Nangila, bulula mukana muanyi, bua mmone mua kukutumbisha.

¹⁸Kuena musue nkulambule milambu. Nansha ya diosha kayena ikulengelela.

¹⁹Mvidi Mukulu wanyi, mulambu undi mua kukulambula,[216] mmuoyi wanyi wa kulekela kuditambisha. Mvidi Mukulu wanyi, kubengi muoyi wanyi udi mupite kunyingalala bikole.

²⁰Unange Siyone, umuenzele bimpe, wibakulule bimana bia Yerushalayime.

²¹Nanku newanyishe bua bakuambule milambu mimpe, nansha ya diosha mene, bu mudi mikenji yebe yamba. Nebafile ngombe milume ku tshilambuilu tshiebe.