Read Tshiluba Misambu 55 Bible Online

Misambu 55 - Tshiluba bible

Misambu 55

¹Musambu wa mu mukanda wa mulombodi wa bena misambu. Wa kuimba ne nzenze. Kasala ka mu mukanda wa misambu ya Davide[228].

²Mvidi Mukulu wanyi, teleja mundi nkutendelela. Kutangidi kukuabu, pandi nkusengelela.

³Unteleje, ungitabe. Makenga mmampite, tshiyi ne dikima!

⁴Baluishi banyi badi bankanyina, bankeba matandu, banjana. Badi basue kumbueja mu dikenga, bankina, bandondakaja ne tshikisu.

⁵Ndi nzakala amu kuzakala. Bowa bua lufu budi bunkuata.

⁶Ndi ntshina, ntutakaja menu, mubidi umvuayila.

⁷Ke meme kujinga ne: “Bu meme ne mapuapua bu nkudimba! Mvua mua kunyema mutantshi mule, bua kupeta dikisha mu tshipela.

⁸Mvua mua kudiela lubilu, mpete muaba wa kusokoma,

⁹muaba udi tshipepele ne mvunde kabiyi mua kungenzela bibi.”

¹⁰Maweja-Nangila, nyangakaja meji a baluishi banyi, bapangakane, bapanduluke.[229] Bualu mu tshimenga ndi mmona amu tshimvundu ne mutoyi,

¹¹bidi binyungulukila butuku ne munya pa bimana biatshi. Munda muatshi mudi amu dikenga ne dikengeshangana.

¹²Munda muatshi mudi amu dibutulangana. Dishima ne ditatshishangana bidi miaba yonsu.

¹³Udi umpenda mpindiewu, kavua muluishi wanyi to, mvua mua kumulengulula. Udi unduisha lelu, kavua nansha nanyi lukuna, mvua mua kumushila muaba.[230]

¹⁴Kadi udi unduisha udi amu wewe, muena mulongu, mulunda wanyi wa pa muoyi, umvua mutekemene muanyi muonsu!

¹⁵Tuvua tuyukila nebe malu onsu patoke, tusanke, tuya ne muoyi umue[231] mu nzubu wa Mvidi Mukulu bua tshibilu.

¹⁶Balunda ba nanku badi mua kufua,[232] bapueke ne muoyi mu kandondu. Bualu bubi mbuase nzubu munda muabu.

¹⁷Meme ndi mbikila Mvidi Mukulu, bua angambuluishe. Nanku Maweja-Nangila neampandishe.

¹⁸Dinda, munda munya, ne dilolu, ndi ndiabakena, ntua mikemu. Kadi neunwue lubila luanyi.

¹⁹Neandame ne muoyi, ansungidile, ku mvita idi bantu bavule banduisha.[233]

²⁰Mvidi Mukulu, mukalenga wa ku tshibangidilu, anteleje, abafuishe bundu. Bualu bantu aba kabena basue kudilengeja, kabena nansha batshina Mvidi Mukulu.

²¹Mulunda mubi udi uluisha balunda bende, upula ndondu uvuaye mutue nabu.

²²Miaku yende ya lubombu mmisheme bu buitshi, kadi udi welangana amu meji a kuluangana mvita. Miaku mipepele idi ipatuka mukana muende, kadi idi amu bu muele wa ntapa kubidi.

²³Teka bujitu[234] bua pa makaya ebe mu bianza bia Mvidi Mukulu. Neakukankamike, kakuanyisha bua muntu wende apungile nabu.

²⁴Mvidi Mukulu, bantu bonsu aba, ubele mu kandondu. Bashipianganyi ne bena dishima nebalale panu amu tshia bibidi tshia matuku abu. Kadi meme, ndi nkutekemena amu wewe.