Read Tshiluba Misambu 56 Bible Online

Misambu 56 - Tshiluba bible

Misambu 56

¹Musambu wa mu mukanda wa mulombodi wa bena misambu. Wa kuimba ne meyi a “Nkudimba pa mitshi minene ya kule.” Kasala ka mukanda wa misambu ya Davide, musaka diba divua bena Peleshete bamukuate mu Ngate[235].

²Mvidi Mukulu wanyi, umfuile luse, bualu bantu badi bandondakaja. Dituku dionsu badi banduisha, bankengesha.

³Baluishi banyi badi bankeba matuku onsu. Bavule badi bangalamina bua kunkuata.

⁴Kadi padi bowa bunkuata, ndi ntekemena kuudi.

⁵Ndi ntumbisha Mvidi Mukulu bua bivuaye mulaye. Pandi mmutekemena, tshiena ntshina tshintu. Tshidi muntu mua kungenzela ntshinyi?

⁶Bindi ngamba, badi babiamba muabu munga.[236] Meji abu adi amu a kungenzela bibi.

⁷Badi batentekela, bangalamina, bandonda mu dikasa, batekemena mua kunshipa.

⁸Bantu bamane kuenza bibi nanku, mudibu mua kuenda tshianana, kabayi babanyoka mbishi?[237] Mvidi Mukulu wanyi, baleja tshiji tshiebe, ubabutule!

⁹Udi mumanye muvuabu bangipata, ngendakana miaba yonsu. Ela binsonji bianyi mu dibungu diebe. Kuena mubifunde bungi buabi mu mukanda webe anyi?[238]

¹⁰Dituku dindi nkubikila, baluishi banyi badi banyema. Ndi mumanye ne: wewe Mvidi Mukulu udi nanyi.

¹¹Ndi ntumbisha Mvidi Mukulu bua bivuaye mulaye. Eyowa, ndi nsamuna Maweja-Nangila bua miaku yende.

¹²Pandi mmutekemena, tshiena ntshina tshintu. Tshidi muntu mua kungenzela ntshinyi?

¹³Mvidi Mukulu nenkumbaje bimvua mukulaye. Nenkuele tuasakidila, nkulambula milambu.

¹⁴Bualu uvua munsungidile ku lufu, mungambuluishe bua tshiponu mu tshiina. Ke mundi mua kuenda kumpala kuebe, mu bukenke budi butokesha batshidi ne muoyi panu.