Read Tshiluba Misambu 57 Bible Online

Misambu 57 - Tshiluba bible

Misambu 57

¹Musambu wa mu mukanda wa mulombodi wa bena misambu. Wa kuimba ne meyi a musambu wa “Kunyangi…”. Kasala ka mu mukanda wa misambu ya Davide. Uvua muusake pavuaye munyeme Shawule,[239] muye kusokoma mu lubuebue.

²Mvidi Mukulu wanyi, umfuile luse, ungambuluishe, bualu ndi mutekemene kuudi. Ndi muimane mu mapuapua ebe, too ne muapita tshipupu etshi.

³Ndi mbikila Mvidi Mukulu, Muena kulu, bualu yeye udi mua kungenzela bionsu.

⁴Neantumine diambuluisha dia mulu. Neatatakaje udi undondakaja.[240] Mvidi Mukulu udi pabuipi nanyi, bualu udi unnanga, ukumbaja malaya ende.

⁵Ndi munkatshi mua bantu ba lonji, badi bu nyama ya ntambue idi idia bantu. Menu abu adi masongoloke bu difuma, nansha bu muketa, ludimi luabu ndutue bu muela wa nkanza.

⁶Mvidi Mukulu, leja bumfumu buebe budi bupite diulu, ne butumbi buebe budi bukenka pa buloba bujima.

⁷Bavua banteya bukondu mu njila, bakeba kungela disoka mu nshingu.[241] Bavua bangumbuile dijimba, kadi amu bobu ke badi badishindamu.

⁸Mvidi Mukulu wanyi,[242] ndi muele meji a bungi munda muanyi, Ke pandi musue kukuimbila misambu bua kukusamuna.

⁹Muoyi wanyi, juka ku tulu! Lunzenze ne lunkombe[243] luanyi, tabulukayi, bualu ndi musue kubisha diba!

¹⁰Maweja-Nangila, ndi musue kukutumbisha mu bukua bisamba, ndi musue kukusamuna, bantu bonsu bateleje.

¹¹Bualu dinanga diebe ndinene, ndiye ne mu diulu. Udi ukumbaja malaya ebe miaba yonsu too ne mu mavuba.

¹²Mvidi Mukulu, leja bumfumu buebe budi bupite diulu, ne butumbi buebe budi bukenka pa buloba bujima.