Read Tshiluba Misambu 60 Bible Online

Misambu 60 - Tshiluba bible

Misambu 60

¹Musambu wa mu mukanda wa mulombodi wa misambu. Wa kuimba ne lunzenze. Kasala ka mu mukanda wa misambu ya Davide. Musambu wa kulongesha bantu.

²Bavua bausake bua kuvuluija bantu muvua Davide muluishe bena Arame ba mu Mezopotamiya ne ba mu Soba. Pavua Yowabe mupingane pambelu, ufuma ku mvita ayi, kutshimunaye bena Edome binunu dikumi ne bibidi mu tshibandabanda tshia Luepu[253].

³Mvidi Mukulu wanyi, wewe uvua mutunyemeshe, munyangakaje mualu wetu wa mvita. Bushuwa uvua mufike munda. Kadi mpindiewu utupingajile bukole buetu!

⁴Uvua muzakeje buloba, mubueleshe mitanta. Kadi jibikila mitanta, bualu buloba budi mua kupuka.

⁵Uvua mumueneshe tshisamba tshiebe mabika ne mala, mutunuishe dikopu dia tshiji, tuenda tutetuka.[254]

⁶Uvua mumanyishe bantu bebe bua banyeme mvita, bapanduke ku miketa ya baluishi.[255]

⁷Fika lukasa, leja bukole buebe, utusungidile. Witabe bitudi tukulomba. Nanku bantu baudi unanga nebapande.

⁸Mu nzubu wende wa tshijila Mvidi Mukulu kuandamuna[256] ne: “Meme ke watshimuna mvita! Nenkosolole tshimenga tshia Shekeme, ngabanyina bantu banyi tshibandabanda tshia Sukote.

⁹Ngilaade nditunga dianyi, Menashe mbuloba buanyi. Efrayime ntshifulu tshianyi tshia tshiamu tshia ku mutu. Yuda ke dikombu dianyi dia bumfumu.

¹⁰Ditunga dia Mowabe ke dilongu dindi ngowela mayi. Ndi ngelela tshisabata tshianyi pambidi pa ditunga dia Edome, bualu ndianyi. Bena Peleshete badi mua kutshimuna[257] anyi?”

¹¹Udi mua kumfikisha mu ditunga dia Edome, bua nkuate bimenga biadi bivuabu bakolesha ne bimana nnganyi?

¹²Amu wewe Mvidi Mukulu ke udi mua kuenza nanku. Kadi wewe kutubenga, kuyi musue kabidi kuenda netu mu mvita.

¹³Tuambuluishaku, tutshimune baluishi betu. Bantu kabena mua kutuambuluisha nansha kakese.

¹⁴Padi Mvidi Mukulu muikale netu, netutshimune, bualu yeye neadiatakaje baluishi betu.[258]