Read Tshiluba Misambu 64 Bible Online

Misambu 64 - Tshiluba bible

Misambu 64

¹Musambu wa mu mukanda wa mulombodi wa bena misambu. Wa mu mukanda wa misambu ya Davide.

²Mvidi Mukulu wanyi, unteleje, ndi ndionga kuudi. Baluishi banyi badi bankuatshisha bowa, unsungidile.

³Bantu babi mbadisange bua kunduisha, mbangelele bifufu bibi.

⁴Ludimi luabu ludi lutue bu muela wa nkanza. Miaku yabu idi bu miketa idi itapa bantu, ishiya lulengu.

⁵Badi bayasa bantu ba nsongu mu musokoku, kabayi babadimuja, kabayi babanemeka.

⁶Badi basonsolangana bua kuenza bibi, bakeba mudibu mua kuteya mateyi mu musokoku, bambilangana ne: “Muntu nansha umue kakumona buteyi ebu[267] to.”

⁷Badi bela meji a kuenzelangana bibi, bamba ne: “Bitudi balongolola ebi mbiobi! Amu patudi batekela apa. Bantu ba meji ke mudibu balongolola malu[268]”

⁸Kadi Mvidi Mukulu udi ubaludikila miketa yende, diakamue idi ibasa, ibatapa mputa.

⁹Mvidi Mukulu mmubapingajile miaku yabu mibi.[269] Bantu bonsu badi babamona balale panshi nanku, badi bakupa mitu, bakatshila.

¹⁰Badi bakema, balondelangana bivua Mvidi Mukulu muenze, bumvua bimpe tshivuaye mubenzele nanku.

¹¹Bantu ba Maweja-Nangila nebasanke, batekemena kudiye. Bantu ba nsongu nebaditembe ne: tudi bena diakalenga!