Read Tshiluba Misambu 65 Bible Online

Misambu 65 - Tshiluba bible

Misambu 65

¹Musambu wa mu mukanda wa mulombodi wabena misambu. Wa mu mukanda wa misambu ya Davide.

²Mvidi Mukulu, Wewe udi usomba mu tshimenga tshia Siyone, mbimpe tukuele tuasakidila, tukumbaje bituvua bakulaye.[270]

³Bualu udi uteleja bantu badi bakutendelela. Ke padibu bonsu bafika kuudi,

⁴nansha bobu benza bibi bipite. Bubi buetu budi butunemenena bujitu.[271] Amu wewe ke udi mua kubujimija.

⁵Muena diakalenga mmuntu uudi musungule bua asombe mu nzubu muebe. Netusanke, tutshionkomoka, bua bilenga bipite, bitudi tupeta muaba webe wa tshijila.

⁶Mvidi Mukulu mutupandishi wetu, wewe nkayebe udi ukumbaja biudi ulaya, wenzela bantu badi bakutendelela malu a dikema. Ke mudi bantu pa buloba bujima batekemena kuudi, nansha badi basomba mu bidila bidi kule.[272]

⁷Udi ushindika mikuna ku bukole buebe, uleja dikanda diudi nadi.

⁸Udi utuyisha tshiona tshia mavuala a mayi manene, utalaja mutoyi wa bantu.

⁹Pa buloba bujima bantu badi bakatshila, malu a dikema audi wenza. Kudi diba dipatukila, ne kudidi dibuelela, bonsu badi bela mbila ya disanka.

¹⁰Udi uditatshisha bua buloba, ulokesha mvula. Buloba budi bufuka, bukuama bimuma. Mvidi Mukulu, wewe udi uwuja misulu ne mayi tente,[273] ulongoluela bantu maminu, wamenesha:

¹¹udi utuma mayi mu mikidi, ulandakaja mabuwa a buloba, ubolesha buloba ne mvula, umenesha ntete.

¹²Tshidimu tshijima udi utuenzela bimpe. Ku ndekelu kuatshi tudi tumona bia pa madimi. Bintu bimpe bidi bipatuka miaba yonsu iudi diata.

¹³Mpata yonsu idi isanguluka, mu mikuna yonsu tudi tumvua amu mbila ya disanka.

¹⁴Bimuna bidi biendakana mu mpata, mu bibandabanda mmuwule ne biakudia. Miaba yonsu bantu badi batua tshianga, bakuimbila misambu.