Read Tshiluba Misambu 69 Bible Online

Misambu 69 - Tshiluba bible

Misambu 69

¹Musambu wa mu mukanda wa mulombodi wa bena misambu ne wa mu mukanda wa misambu ya Davide. Wa kuimba ne nzenze[296].

²Mvidi Mukulu wanyi, unsungidile! Mayi mmankuate ne mu nshingu.

³Ndi mudine mu lunteka ludi kaluyi ne muaba wa kuimana. Ndi munkatshi mua dilembua, mayi ampuekesha.

⁴Ndi mupungile ne diela mbila, muminu unsama. Mvidi Mukulu wanyi, mvua mukutangile, mutekemene kuudi, mesu kunkunza kunzuu!

⁵Badi bankina kapayi bualu,[297] mbapite nsuki ya ku mutu bungi. Badi banshiminyina malu, badi ne dikanda, bakeba kunshipa. Ndi ne bua kupingaja tshindi tshiyi muibe.

⁶Mvidi Mukulu wanyi, udi mumanye bupote buanyi, mutandule malu mabi onsu amvua muenze.

⁷Maweja-Nangila, Mvidi Mukulu wa bukole buonsu, kufuishi bantu badi batekemena kuudi bundu. Mvidi Mukulu wa Izrayele, kuyi ungambuluisha, bantu bonsu aba nebakuangate bibi.

⁸Badi bampenda, bangela bibingu, bualu ndi muntu webe!

⁹Nkadi muenyi munkatshi mua bena diku dietu, nansha bana ba tatu mene kabatshiena bammanye.

¹⁰Dinanga dindi nadi bua nzubu webe, didi dingosha munda bu kapia. Badi bakupenda, mbampende.[298]

¹¹Mvua nnyingalala, njila biakudia[299] bobu kunseka!

¹²Mvua muvuale bilamba bia madilu, bobu kunsaka mu misambu.

¹³Miaba idi bantu basangile[300] badi bantela, banu ba maluvu badi banseka, bangimba mu misambu.

¹⁴Kadi meme, Maweja-Nangila, ndi amu nkutendelela. Ungambuluishe tshikondu tshiudi musungule. Mvidi Mukulu wanyi, bu muudi unnanga bikole, ungitabe, unsungidile.

¹⁵Umpatule mu lunteka lundi ndina, unsungidile kudi badi bankina, unsabule mu dilembua.

¹⁶Muenji kaumpuekeshi, mavuala kaanjimiji. Lukita luanyi kalushadi muinshi mua mayi.

¹⁷Maweja-Nangila, ungitabe, bualu udi munnange. Amu wewe udi mua kungambuluisha. Bu muudi ne luse luvule, untangile.

¹⁸Ndi muntu webe, kunsokomi. Ndi mu dikenga dinene, ungitabe lukasa.

¹⁹Luakunu, ungambuluishe, unsungidile kudi baluishi banyi.

²⁰Udi mumanye mudibu bampenda, bamfuisha bundu, bampetula; udi mumone kumpala kuanyi baluishi banyi bonsu.

²¹Bipendu mbinsunsule muoyi, nkadi mushikile. Mvua mukebe uvua mua kumfuila luse, kadi tshiena mumupete. Mvua muindile uvua mua kunsamba, tshiena mumumone.

²²Baluishi banyi bavua bakisa biakudia bianyi, bampesha maluvu a buanji,[301] pamvua ne nyota.

²³Nanku basombe ne benyi babu ku mesa, babutuke. Badie biakudia bilunga ne buanga mu bibilu biabu bia tshijila, bafue!

²⁴Tshibua tshibatue ku mesu, kabamonyi nganda! Ubatshibule nyima kashidi.[302]

²⁵Ubapumuine tshiji tshiebe, kadilu katshi kakole kaboshe.

²⁶Nzubu yabu ibutuke, bonsu badi mu ntenta yabu babashipe.[303]

²⁷Bualu badi balondakaja muntu uudi mumane kunyoka, batumbula mputa ya baudi mumane kukengesha.[304]

²⁸Badika malu mabi abu onsu, kubafuidi luse ku kalu nansha kamue.

²⁹Ukupule mena abu mu mukanda wa badi ne muoyi.[305] Kubafundi pamue ne bantu bebe.

³⁰Mvidi Mukulu wanyi, ndi mupele, kabidi mubedi, ungambuluishe, unsungidile.

³¹Nenkuimbile misambu, nkuela tuasakidila, ntumbishe dina diebe.

³²Maweja-Nangila, ke bidi bikuenza disanka, mbipite ngombe milume ne mikaji indi nkulambula.[306]

³³Bantu bapuekele nebamone bionsu ebi, nebasanke. “Nuenu bonsu badi bakeba Mvidi Mukulu, nulale panu nuboboke.

³⁴Bualu Mvidi Mukulu udi uteleja bena dikenga, kena ulengulula bantu bende badi mu lukanu.

³⁵Diulu ne buloba, tumbishayi Mvidi Mukulu. Mayi manene ne bionsu bidimu, musamunayi.

³⁶Bualu Mvidi Mukulu neapandishe Siyone, neibakulule bimenga bia Yuda. Bantu bende nebapinganemu, basombemu tshiakabidi.

³⁷Ndelanganyi ya bantu bende, neipiane ditunga diabu edi. Bonsu badi bananga Maweja-Nangila, nebasombemu.”