Read Tshiluba Misambu 73 Bible Online

Misambu 73 - Tshiluba bible

Misambu 73

¹Musambu wa mu mukanda wa misambu ya Asafe[320]. Ndi mumanye ne: Mvidi Mukulu udi unanga Izrayele, nangananga bantu badi bamuitaba.

²Kadi nkavua musue kupambuka mu njila, amu katupa kakese nkavua mua kufinunuka.

³Mvua mbaba bantu badi baditambisha, bavila Mvidi Mukulu, bualu badi bapeta dikasa dimpe mu malu abu onsu.

⁴Bantu abu kabatu basama, badi badiunda, bengelela.

⁵Ntatu idi ikuata bantu, kabena nayi, bipupu bikole bidi kudi bakuabu, kabiena bibalenga.

⁶Badi baditemba, bu bantu bela mabue a busanga. Tshinyangu ke tshiabu tshivualu tshidi tshibakumbanyina.

⁷Badi ne kantu ku bianza, bapepeja bantu bakuabu, bela amu meji[321] a kuenzelangana bibi.

⁸Badi baseka bantu, bakula ne tshikisu,[322] badiela mulu, batshinyisha bakuetu.

⁹Badi basendeka Mvidi Mukulu udi mu diulu, bajana bantu ba pa buloba.

¹⁰Ke padi bamue bena tshisamba tshia Mvidi Mukulu babalonda, bitaba bionsu bidi bantu babi abu bamba.[323]

¹¹Batu bebeja ne: “Tshidi Mvidi Mukulu mumanye ntshinyi? Yeye udi mulu muamua, tuetu panshi!”

¹²Ke mudi bantu badi bayila Mvidi Mukulu. Bakadi ne bintu bivule, bapeta amu bikuabu.

¹³Nanku, ndi muenze malu malenga amu patupu, tshiyi mpeta tshintu. Nansha ku muela wanyi kakuyi mashi, ndi mpangila bionsu.[324]

¹⁴Matuku onsu ndi mmona amu makenga, dinda dionsu ndi mpeta amu dikasa dibi.

¹⁵Kadi meme muele meji a kuakula bu bantu babi abu, mvua mua kuyila tshisamba tshia bana bebe.

¹⁶Ke meme kukeba kujingulula bualu abu, kadi bivua amu binkolela.

¹⁷Kadi meme kubuela mu nzubu webe wa tshijila, kumanya bivua ne bua kubenzekela.

¹⁸Udi mubimanyike muaba mupulumuke bua baselemuke, badiela mu lupongu.

¹⁹Nebabutuke ku mubunyi wa disu. Lufu luabu lubi nelukuatshishe bantu bowa!

²⁰Maweja-Nangila, wewe mujuke bua kubaluisha, nebajimine, bu mudi ndota ijimina muntu, padiye utabala.

²¹Pamvua ne kanyinganyinga, ngumvua bibi munda munda,

²²tshivua kabidi ne lungenyi to. Mvua mutatakane bu nyama, tshiyi mua kukumvua.

²³Kadi wewe uvua amu nanyi diba dionsu, munkuate ku tshianza bua tshiponu.

²⁴Udi undombola mudi meji ebe, ku ndekelu neungakidile mu butumbi buebe.

²⁵Mu diulu udi mua kungambuluisha nnganyi? Ki ngwewe nkayebe anyi? Panu panshi tshindi mua kujinga kabidi ntshinyi? Wewe ke undi nende.

²⁶Nansha mubidi wanyi ne muoyi bienda bishikila, kadi wewe Mvidi Mukulu udi bukole buanyi, ushale wanyi diba dionsu.

²⁷Bantu badi bakubenga, nebajimine, badi bakuvila, nebabutuke butubutuu.

²⁸Kuikala nebe pabuipi ndiakalenga dianyi. Maweja-Nangila, ndi ntekemena kuudi, mmanyisha bantu bionsu biudi muenze.