Read Tshiluba Misambu 78 Bible Online

Misambu 78 - Tshiluba bible

Misambu 78

¹Kasala ka mu mukanda wa misambu ya Asafe[348]. Bantu banyi telejayi bimpe malongesha anyi, teyayi matshi ku bindi nnuambila.

²Nengele lusumuinu, bua kunuambila malu avua menzeke kale.[349]

³Malu aa nga kutudi, atuvua bumvua bantu bamba, ne baledi betu mbatulondelawu.

⁴Katuena basue kuasokoka bana betu, kadi netuambile ndelanganyi yetu, mudibu mua kutumbisha Maweja-Nangila, bukole buende ne malu a kukema adiye muenze.

⁵Uvua mulongeshe bantu bende, kuelelaye bena Izrayele mukenji, kuambilaye bankambua betu, bua balongeshe bana babu malu aa.

⁶Nenku, ndelanganyi idi ilonda, ya bana badi kabayi banji kulela neyibumanye, bua ikale iyuluija bana babu.

⁷Bua bana batekemene kudi Mvidi Mukulu, kabayi bapua muoyi bidiye mubenzele, ne bua balame meyi ende.

⁸Nenku, kabakulonda kabidi ngenzelu ya bankambua babu ivua mibi, ya bantu batomboke, bena mpala ibidi, kabayi balamate Mvidi Mukulu.

⁹Bantu ba mu tshisamba tshia Efrayime,[350] bavua baluangana ne mata a miketa, bakanyema mvita mu dituku adi.

¹⁰Kabavua banemeka ndondu uvuabu batue ne Mvidi Mukulu, bavua babenga mua kulonda mikenji yende.

¹¹Bavua bapue muoyi malu a kukema avuaye muenze, ne bishima bivuaye mubaleje.

¹²Uvua muenze malu a kukema ku mesu a batatuabu, mu ditunga dia Ejipitu ne mu buloba bua Sowane.[351]

¹³Uvua mupande njila mu mayi manene bua kusabukabu, uvua muimanyike mayi bu tshimana.[352]

¹⁴Mu munya uvua ubalombola mu divuba kumpala kuabu, butuku uvua ubakenkeshila tshimunyi tshia kapia.[353]

¹⁵Kupandaye mabue mu tshipela, bua kubapesha mayi a muinshi mua buloba.

¹⁶Kupatulaye mayi mu dibue, kupuekeshaye mayi bu misulu.[354]

¹⁷Kadi kuenzabu malu mabi mu tshipela, kutombokelabu Mvidi Mukulu Muena kulu.

¹⁸Kutetabu Mvidi Mukulu, kumulomba biakudia.

¹⁹Kujanabu Mvidi Mukulu badikonka ne: “Mvidi Mukulu udi ne bukole bua kutupesha biakudia mu tshipela anyi?[355]

²⁰Bulelela, uvua mupande lubuebue, mupatule mayi, ne misulu ya mayi ipueka. Kadi udi mua kutupesha biakudia anyi kupesha bantu bonsu munyinyi anyi?”

²¹Maweja-Nangila umvua amu malu awu, kufikaye munda, kukuatshila bena Izrayele tshiji, bu kapia bua kuosha bantu bende.

²²Bualu bantu bende kabavua bamuitabe, kabavua bangata diambuluisha diende ne mushinga.

²³Kutuminaye mavuba a kulu diyi. Kunzululaye biibi bia diulu.

²⁴Kubalokeshilaye mana bua kudiabu, kupeshaye bantu bende diampa dia mu diulu.[356]

²⁵Kubatuminaye biakudia bikumbane: bantu kudiabu biakudia bia batumibue ba Mvidi Mukulu.

²⁶Pashishe Mvidi Mukulu kupatula lupepela mu diulu, luseke ludi diba dipatukila, kuenzeja lupepela lua kuinshi kua ditunga bua lupepe bikole.

²⁷Kubapatuilaye munyinyi bu lupuishi, nyunyi bungi bu lusenga lua ku muelelu wa mayi manene.

²⁸Kuyiponeshaye panshi, ya bungi mu mitanda, ivua minyunguluke ntenta ya bena Izrayele.

²⁹Maweja-Nangila kubapesha bintu bivuabu bajinga, kubidiabu bungi buvuabu basue.

³⁰Kabayi banji kukumbaja majinga abu, anu patshivuabu ne biakudia mukana,

³¹tshiji tshia Mvidi Mukulu kubatulukila, kushipaye bansongalume ba bena Izrayele.[357]

³²Nansha mubashipe nanku, bena Izrayele kuenzabu kabidi malu mabi, kabena bitabe malu avua Mvidi Mukulu muenze a kukema nansha.

³³Nenku kubajimijaye diakamue, kubashipa bonsu musangu umue.

³⁴Bamane kupunga ne lufu, kutangilabu kabidi kudi Mvidi Mukulu, kupinganabu kudiye bakeba diambuluisha diende.

³⁵Kuvulukabu ne Mvidi Mukulu uvua lubuebue luabu, Mvidi Mukulu Muena kulu uvua musungudi wabu.

³⁶Kadi kabavua ne bulelela. Bivuabu bamuambila bivua bia dishima.

³⁷Kabavua bamulamate nansha, bavua bupule ndondu uvuabu batue nende.

³⁸Kadi yeye uvua mubanange, ubafuila luse, kayi ubabutula. Kavua ulonda muvua tshiji tshiende tshimuambila. kavua ulonda meji atshi,

³⁹uvua uvuluka ne badi amu bantu, badi bu lupepela ludi lupatuka kaluyi lupingana kabidi.

⁴⁰Mmisangu bungi munyi kuabu bamutombokele mu tshipela! Mmisangu bungi munyi kuabu bamunyingalaje mu muaba awu uvua kauyi mayi!

⁴¹Kutuadijabu tshiakabidi kuteta Mvidi Mukulu. Kutombokelabu Mvidi Mukulu wa Tshijila wa Izrayele.

⁴²Kupuabu muoyi bivuaye mubenzele, pavuaye mubapatule mu bianza bia baluishi,

⁴³kabayi bavuluka bishima biende, bivuaye mubenzele mu Ejipitu ne malu a kukema mu ditunga dia Sowane.

⁴⁴Mayi a mu majiba kuandamuka mashi, bua bena Ejipitu kabapetshi mayi a kunua.[358]

⁴⁵Njiji kua ibasuma, ibanua mashi, kubatumina ndimba kua ibatatshisha, kubutulayi bintu bionsu.[359]

⁴⁶Mikumbi kunyanga bia pa madimi. Bivuabu banowa, kubidiabu kudi mpasu.[360]

⁴⁷Kubutulaye madimi abu a mionji ya mvinyo ku mvula ya mabue, kushimbula mitshi yabu ya sikomore ku mvula wa tshipupu.[361]

⁴⁸Bimuna biabu kubutuka ku mabue a mvula, ne bisumbu biabu bia mikoku ku muele wa mvula.[362]

⁴⁹Ku ndekelu Mvidi Mukulu kutumina bena Ejipitu tshiji tshikole, kubafikila munda, kubakengesha mishindu yonsu.

⁵⁰Nanshaye kukandika tshiji tshiende, kavua amu mubatumine lufu nkayalu, kadi, kubatuminaye kabidi bipupu bia mishindu yonsu[363]:

⁵¹mu meku a bena Ejipitu, mu ndelanganyi ya bana ba Kame, kubutulaye ba muana buta, bana bavuabu balela kumpala patshivuabu ne bukole.[364]

⁵²Pashishe kutumaye bantu bende, bu tshisumbu tshia mikoku tshidi tshipatuka mu tshikumbi, kuyaye ne bantu bende mu tshipela bu mudi muntu ulombola mikoku yende.[365]

⁵³Kubalombolaye mu ditalala kabayi ne bowa, baluishi babu mayi manene kubabuikila.[366]

⁵⁴Pashishe kubafikisha mu buloba buende bua tshijila, ku mukuna uvuaye munyenge ku bukole buende.[367]

⁵⁵Kuipataye bisamba bia bantu benyi bobu batangile, kubapeshaye buloba ebu, bu bumpianyi buabu. Kupingajaye bena Izrayele mu buloba bua bena Kanaane.[368]

⁵⁶Kadi bobu kubenga Mvidi Mukulu Muena kulu, kumutombokela, kushipa mikenji yende.[369]

⁵⁷Kushalabu bantu babi, bashipianganyi, bu muvua bankambua babu, kubengabu mikenji, bu mudi nshinga ya buta mituntumuke.

⁵⁸Kupendabu Maweja-Nangila, batendelela pa mikuna miaba ya bantu benyi, mvidie ya bantu ba bisamba bikuabu, kumufikishabu munda ne disonga dia mpingu ya mvidie ya patupu.

⁵⁹Mvidi Mukulu umona nanku, kufikaye munda, kuengululaye bena Izrayele.

⁶⁰Kushiyaye nzubu wende wa Silo, ntenta uvuaye musombe munkatshi mua bantu.[370]

⁶¹Bua mushete wa ndondu, tshimanyinu tshia bukole buende ne lumu luende, kuufilaye mu bianza bia baluishi bua kuyawu mu bupika.[371]

⁶²Bu muvuaye mufikile bantu bende munda, kubafilaye bua babashipe.

⁶³Kapia kubutula bansongalume, kupangabu mua kuimbila nsongakaji misambu.[372]

⁶⁴Batuangaji kufua ku muele wa mvita, kakuvua kushala nansha bakaji bakamba bua kudila.

⁶⁵Pashishe Maweja-Nangila kutabala, bu mudi muntu mujuke ku tulu, bu mudi muena mvita wa bukitu, mutenduke maluvu.

⁶⁶Maweja-Nangila kukuma baluishi bende, kubipata, kubafuisha bundu kashidi.

⁶⁷Yeye kuipata ndelanganyi ya Yozefe, kubenga kusungula tshisamba tshia Efrayime,[373]

⁶⁸kadi kusungulaye tshisamba tshia Yuda, ke mukuna wa Siyone uvuaye munange.

⁶⁹Yeye kuibakilapu nzubu wende wa tshijila, nzubu uvua mukole bu diulu, ne bu buloba, buvuaye muibake nabu nzubu wa kashidi.

⁷⁰Maweja-Nangila uvua musungule Davide, bua kuikala muena mudimu wende. Uvua muye kumukeba mu tshikumbi tshia mikoku,

⁷¹uvua mumuangate pavuaye ulonda mikoku mu nyima, bua kuikala mulami wa bena Izrayele, bantu bende bavuaye mupite kunanga.[374]

⁷²Davide kuenza mudimu wende, kulombola tshisamba tshia Maweja-Nangila, ne muoyi mulenga kabidi ne meji.